Իսրայելը Սիրիայում գործում է իրանական ագրեսիայի դեմ․ Նեթանյահու

Իսրայելը Սիրիայում գործում է Իրանի և իրանական ագրեսիան խթանող սիրիական ուժերի դեմ։ Այս մասին Իսյարելի հարավում գտնվող Էյլաթ քաղաքում նոր օդանավակայանի բացման արարողության ժամանակ հայտարարել է Բենիամին Նեթանյահուն։

«Մենք գործում ենք Իրանի և այն սիրիական ուժերի դեմ, որոնք աջակցում են իրանական ագրեսիային։ Մենք կվնասենք ցանկացացին, որը կսպառնա մեզ վնաս հասցնել։ Յուրաքանչյուրը, որը կսպառնա մեզ ոչնչացնել, կկրի դրա ամբողջ պատասխանատվությունը», - հայտարարել է Նեթանյահուն։

«Նախորդ գիշեր իսրայելական օդուժը ուժեղ հարվածներ է հասցրել Սիրիայում իրանական ուժերին այն բանից հետո, երբ այնտեղից Իրանը հրթիռներ էր ուղարկել Իսրայելի տարածքի ուղղությամբ։ Մենք չենք անտեսելու ագրեսիայի նման դրսևորումները», - շարունակել է Իսրայելի վարչապետը։

Հիշեցնենք, որ հունվարի 20-ին իսրայելցի զինվորականները գիշերային հարձակման ընթացքում գրոհել են Սիրիայում գտնվող իրանական ռազմական օբյեկտները՝ վերապատրաստման ճամբարը, զինամթերքի պահեստը և հետախուզության հենակետերը։

Հունվարի 13-ին Բենիամին Նեթանյահուն հայտարարել էր, որ Իսրայելը պատրաստ է ավելացնել Սիրիայում իրանական ռազմական օբյեկտների վրա հարձակումները, որպեսզի կանխի Թեհրանի ռազմական ամրապնդումը հարևան այս երկրում։