Ճապոնիան հրաժարվում է աշխատանքային վիզաներ տրամադրել Թուրքիայի քաղաքացիներին

Ճապոնիայի իշխանությունները Թուրքիան չեն ներառել այն պետությունների ցանկում, որոնց քաղաքացիները կարող են աշխատանքային վիզաներ ստանալ։ Այս մասին գրում է թուրքական Anadolu գործակալությունը՝ նշելով, որ սա առաջացրել է թուրք դիվանագետների վրդովմունքը։

Վիզային համակարգում կատարված փոփոխությունների շնորհիվ՝ 2019 թ․ ապրիլից աշխատանքային վիզայով Ճապոնիա կարող են ժամանել շուրջ 500 հազար օտարերկրյա աշխատողներ։ Սրանց թվում, սակայն, թուրքեր չեն լինի։ Թուրքիան հայտնվել է այն պետությունների թվում, որոնց քաղաքացիներին չեն տրամադրվի աշխատանքային վիզաներ։

Սա առաջացրել է թուրք քաղաքական գործիչների դժգոհությունը։ Թուրքիայի արտաքին գործերի նախարարության ներկայացուցիչ Համի Աքսոյը հայտարարել է, որ սա չի անդրադառնա երկու երկրների դաշնակցային հարաբերությունների վրա։ Նա ընդգծել է, որ այդ ցուցակները «պետք է վերանայվեն, որքան հնարավոր է շուտ»։ Անկարայում Ճապոնիայի դեսպանը հրավիրվել է արտաքին գործերի նախարարություն, որտեղ նրան է փոխանցվել թուրքական կողմի դժգոհությունը։

Նախորդ տարվա նոյեմբերին պարզ էր դարձել, որ ճապոնական իշխանությունները ցանկանում են բարեփոխումներ մտցնել վիզային համակարգում, որպեսզի ներգրավվեն օտարերկրյա ներդրողներ և զբոսաշրջիկներ։