Անկարան դատապարտում է ապրիլի 24-ը Հայոց Ցեղասպանության զոհերի հիշատակի օր հռչակելու մասին Մակրոնի հայտարարությունը
Թուրքիան խստորեն դատապարտում է Ֆրանսիայի նախագահ Էմանուել Մակրոնի հայտարարությունը ապրիլի 24-ը Հայոց Ցեղասպանության զոհերի հիշատակի ազգային օր հռչակելու վերաբերյալ։ Այս մասին ասվում է Թուրքիայի նախագահ Ռեջեփ Թայիփ էրդողանի պաշտոնական ներկայացուցիչ Իբրահիմ Քալընի հայտարարության մեջ։
«Մենք վճռականորեն դատապարտում ենք Ֆրանսիայի նախագահ Էմանուել Մակրոնի հայտարարությունը ապրիլի 24-ը հայերի ցեղասպանության զոհերի հիշատակի ազգային օր հռչակելու մասին։ Հայերի ցեղասպանության մասին պնդումները քաղաքական ստեր են և հակասում են պատմական փաստերին և չունեն իրավական հիմք», - ասվում է Քալընի հայտարարության մեջ։
Հիշեցնենք, որ ավելի վաղ Ֆրանսիայի նախագահ Էմանուել Մակրոնը Փարիզում հայ համայնքի հետ ամենամյա ընթրիքի ժամանակ հայտարարել էր, որ ապրիլի 24-ը նշվելու է Հայոց ցեղասպանության հիշատակի ազգային օր։
«Ֆրանսիան գիտի, թե ինչպես առերեսվել պատմությանը: Այն առաջիններից էր, որ 1915 թ. հայ ժողովրդի զանգվածային սպանություններն անվանեց ցեղասպություն և 2001 թ. ճանաչեց օրենքի ուժով», - ասել էր Մակրոնը՝ հավելելով, որ ապրիլի 24-ը Հայոց Ցեղասպանության հիշատակի օր հռչակելու գործընթացն ավարտին կհասցվի առաջիկա շաբաթների ընթացքում: