Քրդերը դեռ շարունակում են մնալ Մանբիջում․ Չավուշօղլու

Թուրքիայի արտաքին գործերի նախարար Մևլութ Չավուշօղլուն հայտարարել է, որ քրդական զորաջոկատները շարունակում են լինել Մանբիջի տարածքում, չնայած Վաշինգտոնի և Անկարայի միջև համաձայնեցված ճանապարհային քարտեզի աշխատանքների կատարմանը։

«Վերջին շրջանում սիրիական Մանբիջի վերաբերյալ ճանապարհային քարտեզի իրականացման աշխատանքներն արագացել են, սակայն Մանբիջի տարածքում դեռ մնացել են քրդական զորաջոկատներ», - հայտարարել է Մևլութ Չավուշօղլուն։

Խոսելով ամերիկյան զորքերի դուրսբերումից հետո Սիրիայի տարածքում անվտանգության գոտի ստեղծելու մասին՝ Չավուշօղլուն ասել է, որ դա անընդունելի է, քանի որ դա կարող է Սիրիայում գործող ահաբեկչական խմբավորումների համար պաշտպանություն լինել։

Ավելի վաղ Թուրքիայի նախագահ Ռեջեփ Թայիփ Էրդողանը Սիրիայում գործող քրդական «Ժողովուրդների ինքնապաշտպանական ջոկատներ» զորամիավորմանը մի քանի շաբաթ ժամանակ է տվել, որպեսզի վերջինս դուրս գա Մանբիջից։

Հիշեցնենք, որ նախորդ տարվա հունիսին Թուրքիայի Զինված ուժերի գլխավոր շտաբը հաղորդել էր, որ Գերմանիայում ամերիկացի զինվորականների հետ բանակցությունների արդյունքում մշակվել է Մանբիջից քրդական զորաջոկատները դուրս բերելու գործողությունների ծրագիր։