Միլոշ Զեմանը սադրանք է համարում Պրահայի օդանավակայանում ռուս դիվանագետի հետ տեղ ունեցած միջադեպը
Չեխիայի նախագահ Միլոշ Զեմանը TVBarrandov հեռուստաալիքի եթերում մեկնաբանել է ռուսական պատվիրակության անդամին Չեխիա մուտք գործել թույլ չտալու դեպքը։
«Ես կարծում եմ, որ այս դեպքը հիմար սադրանքի արդյունք է, որովհետև ես գիտեմ, որ ռուսական պատվիրակությունը մտածել է պտտվել և վերադառնալ։ Իսկ քանի որ Պրահայում պետք է կայանար միջկառավարական խորհրդի նիստ, որը չափազանց կարևոր էր տնտեսական հարաբերությունների զարգացման համար, նրանք չգնացին այդ քայլին», - ասել է Զեմանը։
Նրա խոսքով՝ կան մարդիկ, որոնք բացի հիմար սադրանքներից, ոչինչ չեն կարողանում անել։
«Անհրաժեշտ է հարցնել՝ ով է վնասում և ով է նպաստում որևէ նշանակալի երկրի հետ տնտեսական հարաբերությունների զարգացմանը», - շարունակել է Չեխիայի նախագահը։
Ավելի վաղ՝ մարտի 5-ին, Ռուսաստանի արտգործնախարարության ներկայացուցչին թույլ չէին տվել պաշտոնական պատվիրակության կազմում մուտք գործել Չեխիա։ Նա պետք է մասնակցեր Պրահայում միջկառավարական խորհրդի նիստին։
Տեղի ունեցածին անդրադարձել էր նաև ՌԴ արտաքին գործերի նախարարության պաշտոնական ներկայացուցիչ Մարիա Զախարովան։ Նա նշել էր, որ Պրահայի այս քայլն անպատասխան չի մնա, և Մոսկվան արդեկվատ պատասխան կտա։