Փհենյանը պատրաստակամություն է հայտնում ապամիջուկայնացում կատարելու և Վաշինգտոնի հետ բանակցությունները շարունակելու
Հյուսիսային Կորեան հավատարիմ է ապամիջուկայնացման վերաբերյալ իր հանձնառություններին և պատրաստակամություն է հայտնում ԱՄՆ-ի հետ կրկին բանակցելու։ Այս մասին ասվում է կորեական Uriminzokkiri պորտալում տեղ գտած հոդվածում, որն ստացել էր «Ճանապարհ դեպի ամբողջական ապամիջուկայնացում․ մեր անսասան դիրքորոշումը» վերնագիրը։
«Մեր կտրուկ դիրքորոշումն այն է, որ պետք է նոր հարաբերություններ ձևավորվեն երկու պետությունների միջև, և այդ հարաբերությունները պետք է համապատասխանեն նոր հարյուրամյակի պահանջներին, ինչպես նաև հող նախապատրաստվի ամբողջական ապամիջուկայնացման և Կորեական թերակղզում խաղաղության և կայունության հաստատման համար», - գրում է հոդվածի հեղինակը։
Նշվում է նաև, որ Կիմ Չեն Ընի և Դոնալդ Թրամփի միջև Հանոյում տեղի ունեցած հանդիպումից հետո կողմերը համաձայնություն են ձեռք բերել երկխոսությունը շարունակելու և խնդրի լուծման ճանապարհներ փնտրելու հարցում։
Հիշեցնենք, որ Վիետնամի մայրաքաղաք Հանոյում փետրվարի 27-28-ին տեղի է ունեցել ԱՄՆ-ԿԺԴՀ գագաթնաժողովը։ Փետրվարի 27-ին տեղի է ունեցել երկու երկրների առաջնորդների հանդիպում, որը տևել է 2,5 ժամ։ Թրամփը և Կիմ Չեն Ընը քննարկել են Սինգապուրում ձեռք բերված պայմանավորվածությունները։
Փետրվարի 28-ին տեղի ունեցած ընդլայնված կազմով հանդիպման ժամանակ Թրամփը հայտարարել է, որ ունեցել են արդյունավետ երկխոսույթուն, և հույս հայտնել, որ Կիմ Չեն Ընի հետ կունենան երկարամյա հաջող համագործակցություն։
Հյուսիսային Կորեայի առաջնորդն, իր հերթին, հայտարարել է, որ պատրաստ է ապամիջուկայնացում կատարել՝ ողջունելով Փհենյանում ամերիկյան կոորդինացիոն բյուրո բացելու առաջարկը։
Ավելի ուշ հայտնի էր դարձել, որ կողմերին չի հաջողվել համաձայնության հասնել և փաստաթուղթ ստորագրել՝ չնայած հայտարարվել է «արդյունավետ երկխոսություն ունենալու» մասին։