Չինաստանը պատրաստ է օգնություն տրամադրել Վենեսուելային էլեկտրամատակարարման համակարգը վերականգնելու հարցում

Չինաստանը պատրաստ է օգնություն տրամադրել Վենեսուելային էլեկտրամատակարարման մասշտաբային դադարի վնասը վերականգնելու համար։ Այս մասին հայտարարել է Չինաստանի արտաքին գործերի նախարարության պաշտոնական ներկայացուցիչ Լու Կանը։

«Մենք հույս ունենք, որ Վենեսուելայի իշխանությունները կարող են ստեղծված իրավիճակից ելք գտնել և վերականգնել սոցիալական համակարգի բնականոն գործունեությունը։ Չինաստանը պատրաստ է տեխնիկական աջակցություն տրամադրել Վենեսուելային այս հարցում», -  ասել է ԱԳ ներկայացուցիչը։

Նրա խոսքով՝ մի քանի օր երկրում էլեկտրաէներգիայի մատակարարման դադարը լրջագույն խնդիրների պատճառ է դարձել։

Ավելի վաղ Նիկոլաս Մադուրոն հայտարարել էր, որ պատրաստվում է դիմել ՄԱԿ-ին, Ռուսաստանին, Չինաստնին, Իրանին և Կուբային, որպեսզի վերջիններս օգնեն երկրի էլեկտրամատակարարման համակարգի վրա կատարված հարձակման հետաքննության հարցում։

Հիշեցնենք, որ մարտի 7-ին Կարակասը և Վենեսուելայի 23 նահանգներից 20-ը մնացել էին առանց էլեկտրամատակարարման։ Ազգային էլեկտրամատակարարման ընկերության տվյալներով՝ տեղի ունեցածի պատճառը երկրի խոշորագույն Հիդրոէլեկտրոկայանի՝ Սիմոն Բոլիվարի անվան ՀԷԿ-ի սաբոտաժն է։

Վենեսուելայի նախագահ Նիկոլաս Մադուրոն տեղի ունեցածի մեջ մեղադրում է «ամերիկյան իմպերիալիզմին»։

Հաջորդ օրը Կարակասի մի շարք թաղամասերում էլեկտրաէներգիայի մատակարարումը հաջողվել էր մասամբ ժամանակավորապես վերականգնել, սակայն ավելի ուշ կրկին դադարել էր։