Շվեդիան պահանջել է, որ ռուս դիվանագետներից մեկը լքի երկիրը

Մարտի 13-ին Ստոկհոլմում ՌԴ դեսպան Վիկտոր Թաթարինցևը հրավիրվել է Շվեդիայի արտաքին գործերի նախարարությունը, որտեղ նրանից պահանջել են, որ ռուս դիվանագետներից մեկը լքի երկիրը։

Այս մասին հայտնել է Nyheter թերթը՝ հղում կատարելով շվեդական արտաքին քաղաքական գերատեսչության աղբյուրներին։

Շվեդիայի ԱԳՆ ներկայացուցիչ Պատրիկ Նիլսոնը հաստատել է Թաթարինցևին հրավիրելու մասին լուրը, սակայն չի հայտնել, թե կոնկրետ ինչ է քննարկվել հանդիպման ժամանակ։

Ինչպես նշում է աղբյուրը, այդ դիվանագետը կապ ունի Շվեդիայի մի քաղաքացու հետ, որն այս տարվա փետրվարին ձերբակալվել էր Մոսկվայի օգտին լրտեսություն կատարելու կասկածանքով։ Այդ մարդը չի ընդունում իր մեղքը։ Նա աշխատել է բարձր տեխնոլոգիաների ոլորտում։

Ավելի ուշ շվեդական լրատվամիջոցները հաղորդում էին, որ ռուսական դիվանագիտական ներկայացուցչության աշխատակիցը լքել է երկիրը։ Ավելի ուշ, սակայն, պարզվեց, որ դա ապատեղեկատվություն էր։