Նոր Զելանդիայում մզկիթի վրա տեղի ունեցած զինված հարձակման հետևանքով զոհվել է 27 մարդ
Նոր Զելանդիայի Կրայստչերչ քաղաքում գտնվող Ալ Նուր և Լինվուդ մզկիթներում տեղի ունեցած հրաձգության հետևանքով զոհվել է 27 մարդ։ Այս մասին տեղեկացնում է Otago Daily Times-ը՝ նշելով, որ ոստիկանությանը հաջողվել է ձերբակալել հանցագործներից մեկին։
Television New Zealand-ի փոխանցմամբ՝ ավելի քան երեք տասնյակ մարդ տեղափոխվել է հիվանդանոց։
Ավելի վաղ լրատվամիջոցները հայտնում էին, որ կրակոցների հետևանքով զոհվել է տասը մարդ։
Մարտի 15-ին՝ տեղի ժամանակով 13։45-ին՝ անմիջապես ցերեկվա աղոթքից հետո, զինված անձինք մուտք էին գործել Ալ Նուր և Լինվուդ մզկիթներ և փակել բոլոր դռները։
Ականատեսների վկայությամբ՝ գրոհի ժամանակ մզկիթի ներսում եղել է 200-300 մարդ։ Դռները փակելուց հետո հնչել են կրակոցներ։
Ներկա պահին ոստիկանությունը որևէ տեղեկություն չի տրամադրում զոհերի մասին և կոչ է անում քաղաքացիներին տանից դուրս գալ միայն ծայրահեղ անհրաժեշտության դեպքում։
Քաղաքի բոլոր դպրոցները և ուսումնական հաստատությունները փակ են։