Նոր Զելանդիայում մզկիթի վրա տեղի ունեցած զինված հարձակման հետևանքով զոհերի թիվը հասել է 40-ի
Նոր Զելանդիայի Կրայստչերչ քաղաքի մզկիթում տեղի ունեցած զինված հարձակման հետևանքով զոհերի թիվը հասել է 40-ի, ևս 20 մարդ ծանր վիրավորվել է։ Այս մասին տեղի ունեցած մամուլի ասուլիսի ընթացքում հայտարարել է Նոր Զելանդիայի վարչապետ Ջասինդա Արդերնը։
«Մենք հաշվել ենք, որ 19։00-ի դրությամբ ունենք արդեն 40 զոհ։ Նրանցից 10-ը մահացել են Լինվուդի մզկիթում, 3-ը՝ եղել են դրսում», - ասել է վարչապետը։
Stuff լրատվական գործակալությունն, իր հերթին, հաղորդում էր, որ Կրայստչերչի հիվանդանոցում բուժօգնություն է ստանում 48 տուժած, որոնք ստացել են հրազենային վնասվածքներ։
Վարչապետ Արդերնի խոսքով՝ երկրում ազգային անվտանգությանը սպառնացող վտանգի աստիճանն աննախադեպ բարձր է։
Մարտի 15-ին՝ տեղի ժամանակով 13։45-ին՝ անմիջապես ցերեկվա աղոթքից հետո, զինված անձինք մուտք էին գործել Ալ Նուր և Լինվուդ մզկիթներ և փակել բոլոր դռները։
Ականատեսների վկայությամբ՝ գրոհի ժամանակ մզկիթի ներսում եղել է 200-300 մարդ։ Դռները փակելուց հետո հնչել են կրակոցներ։
Ներկա պահին ոստիկանությունը որևէ տեղեկություն չի տրամադրում զոհերի ինքնության մասին և կոչ է անում քաղաքացիներին տանից դուրս գալ միայն ծայրահեղ անհրաժեշտության դեպքում։
Քաղաքի բոլոր դպրոցները և ուսումնական հաստատությունները փակ են։