Նեբրասկայում ջուրը հեղեղել է երկու ռազմաբազա

ԱՄՆ-ի Նեբրասկա նահանգում տեղի ունեցած հեղեղի հետևանքով ջրի տակ են անցել նվազագույնը երկու ռազմաբազա, որոնց թվում՝ ռազմաօդային ուժերի Offutt ավիաբազան, որտեղ տեղակայված է Զինված ուժերի ռազմավարական հրամանատարության կենտրոնակայանը։ Այս մասին գրում է ՏԱՍՍ-ը։

«Ներկա պահին հեղեղվել է ԱՄՆ ռազմաօդային ուժերի Offutt ավիաբազայի մեկ երրորդը։ Բարեբախտաբար ինքնաթիռները և մարդիկ չեն տուժել», - ասվում է ռազմաբազայի թվիթերյան էջում տեղ գտած հայտարարության մեջ։

Herald World  թերթի տվյալներով՝ բազայում ջրի տակ են մնացել մոտ երեք տասնյակ տներ։ Նմանատիպ իրավիճակ է նաև Ազգային գվարդիայի Էշլենդ բազայում։

Associated Press գործակալության փոխանցմամբ՝ բնական աղետներն այս շրջանում հանգեցրել են արդեն երեք մարդու մահվան։ Ավելի քան 870 մարդ տարհանվել է և տեղափոխվել ժամանակավոր բնակության վայրեր։ Նեբրասկայի գյուղատնտեսության քարտուղարությունում արդեն հաշվարկել են ստացված վնասի չափը։ Այն կազմում է ավելի քան 400 միլիոն դոլար։

ԱՄՆ փոխնախագահ Մայք Փենսը պատրաստվում է այցելել Նեբրասկա՝ տեղում գնահատելու իրավիճակը։