Ղազախստանի խորհրդարանը հավանության է արժանացրել Աստանան Նուրսուլթան անվանափոխելու մասին առաջարկը

Ղազախստանի խորհրդարանի պատգամավորները երկու ընթերցմամբ հավանության են արժանացրել երկրի մայրաքաղաքը նախկին նախագահ Նուրսուլթան Նազարբաևի պատվին անվանակոչելու մասին առաջարկը։ Այս մասին տեղեկացնում է Ռիա Նովոստի-ն։

«Ընդունվել է պատմական որոշում», - ասել է Ղազախստանի խորհրդարանի ստորին պալատի խոսնակ Նուրլան Նիգմատուլինը։

Այժմ փաստաթուղթը պետք է ստորագրի նաև երկրի նոր ղեկավար Ժոմարտ Տոկաևը, որն էլ հենց նախաձեռնության հեղինակն է։ Տոկաևն առաջարկել է նաև հուշարձան կանգնեցնել Նազարբաևի պատվին և նրա անունով անվանակոչել երկրի տարբեր շրջանների կենտրոնական փողոցները։

Այսօր առավոտյան տեղի է ունեցել Ժոմարտ Տոկաևի երդմնակալության արարողությունը, որից հետո է նա պաշտոնապես ստանձնել է երկրի ղեկավարի պարտականությունները։

Հիշեցնենք, որ երեկ հրաժարական էր տվել Նուրսուլթան Նազարբաևը և հայտարարել, որ լինելու է երկրի անվտանգության խորհրդի նախագահը և մնալու է իշխող՝ Նուր Օթան կուսակցության ղեկավարի պաշտոնում։

Նուրսուլթան Իբիշևիչ Նազարբաևը Ղազախստանի նախագահն էր 1990 թվականից ի վեր։ 2015 թ․ նա վերընտրվել էր 5-րդ ժամկետով։

We use cookies to ensure that we give you the best experience on our website. You may delete and block all cookies from us, but certain parts of the site may not work properly.