Գազայի հատվածից արձակված հրթիռն ընկել է Իսրայելի կենտրոնական շրջանում գտնվող տներից մեկի վրա
Գազայի հատվածից արձակված հրթիռն ընկել է Իսրայելի կենտրոնական Միշմերետ բնակավայրի տներից մեկի վրա։ Այս մասին տեղեկացնում է Շարոնի շրջանային ոստիկանության մամուլի ծառայությունը։
«Որոշ ժամանակ առաջ Իսրայելի ոստիկանությունն ստացել է տվյալներ Միշմերետ մոշավում (իսրայելական գյուղական բնակավայր, - խմբ․) տեղի ունեցած հրթիռային հարձակման մասին։ Հրթիռն ընկել է տան վրա․ վերջինս այրվել է», - ասվում է ոստիկանության տարածած հաղորդագրության մեջ։
Նշվում է, որ հարձակման հետևանքով տուժել է վեց իսրայելցի, այդ թվում՝ երեխաներ։
«Բժիշկները օգնություն են ցույց տալիս վեց բնակչի, այդ թվում՝ 50-ամյա մի կնոջ, որն ստացել է միջին ծանրության վնասվածք։ Մի տղամարդ, կին և երեխա էլ ստացել են թեթև վնասվածքներ», - հայտնում են բուժհաստատությունից։
Եվս մի քանի մարդ էլ վնասվածք է ստացել տարհանման ժամանակ։
Իսրայելի պաշտպանության բանակից հաղորդում են, որ արձանագրել են Գազայի հատվածից հրեական պետության կենտրոնական հատված եկող հրթիռ։ Ավելի վաղ զինվորականները հայտնել էին, որ Շարոնի շրջանում միացել է օդային ազդանշանային համակարգը։