Օբաման սպառնում է Մոսկվայի դեմ պատասխան միջոցներ ձեռք առնել
ԱՄՆ-ի նախագահ Բարաք Օբաման հայտարարել է, որ Վաշինգտոնը պատրաստվում է Մոսկվայի նկատմամբ որոշակի քայլեր ձեռնարկել՝ կապված ՄԻացյալ Նահանգների ընտրական գործընթացներին Ռուսաստանի միջամտության հետ։ Այս մասին ԱՄՆ-ի նախագահը խոսել է NPR ռադիոյին տված հարցազրույցի ժամանակ։
«Կարծում եմ՝ մենք անկասկած պետք է միջոցներ ձեռք առնենք, երբ յուրանքանչյուր օտար երկրի իշխանություն փորձում է ազդել մեր ընտրությունների անաչառության վրա», - ասել է Օբաման։
Նրա խոսքով՝ Վլադիմիր Պուտինը լավ գիտի, թե որպես ԱՄՆ-ի նախագահ ինչ է զգում ինքը, քանի որ անձամբ է ասել Պուտինին այդ մասին։
Նշենք, որ այս տարվա հոկտեմբերին ԱՄՆ-ի հետախուզական ծառայությունները հայտարարել էին, որ ռուս ցանցահենները կիբերհարձակումներ են իրականացրել Դեմոկրատական կուսակցության սերվերների վրա։ Ավելի ուշ Կենտրոնական հետախուզական վարչությունը պաշտոնապես մեղադրել է Մոսկվային, որ վերջինս նման ճանապարհով փորձել է միջամտել ընտրական գործընթացներին և այդպիսով օգնել Դոնալդ Թրամփին դառնալ ԱՄՆ-ի նախագահ։ Անձամբ Թրամփը ծիծաղելի է համարել այդ պնդումները։
ՌԴ արտաքին գործերի նախարար Սերգեյ Լավրովը, անդրադառնալով այս թեմային, նշել է որ Դոնալդ Թրամփին օգնել են ԱՄՆ-ի նախագահ դառնալ Ամերիկայի քաղաքացիները, ոչ թե Ռուսաստանը։