Դեմոկրատների մեծ մասը դեմ է Քլինթոնի թեկնածությանը հաջորդ նախագահական ընտրություններում
ԱՄՆ-ի դեմոկրատական կուսակցության աջակիցների մեծ մասը չի ցանկանում, որ Հիլարի Քլինթոնն առաջադրի իր թեկնածությունը 2020 թ-ի նախագահական ընտրություններում։ Այս մասին են վկայում ամերկյան USA Today պարբերականի և Սաֆֆոլկի համալսարանի հետազոտությունների կենտրոնի կողմից դեկտեմբերի 14-ից 18-ն անցկացված հարցման արդյունքները։
Անցկացված սոցհարցումների համաձայն՝ հարցվածների 62%-ը դեմ է, որ նախկին պետքարտուղար Հիլարի Քլինթոնն առաջադրի իր թեկնածությունը հաջորդ նախագահական ընտրություններին։ Հարցվածների 44%-ը նախագահական հաջորդ ընտրապայքարում ցանկանում է տեսնել սենատոր Բեռնի Սանդերսին, իսկ 43%-ը՝ ներկայիս փոխնախագահ Ջո Բայդենին, որը լրագրողներին տված մի քանի հարցազրույցում չի բացառել, որ հաջորդ նախագահական ընտրություններում կարող է առաջադրել իր թեկնածությունը։
Հատանշական է, որ սոցհարցմանը մասնակցած մարդկանց 66%-ը համաձայնել է հաջորդ ընտրություններում քվեարկել բոլորովին նոր և նախկինում անհայտ թեկնածուի օգտին։
Հիշեցնենք, որ Վերմոնտ նահանգի սենատոր Բեռնի Սանդերսը դեմոկրատների միջև անցկացված ներկուսակցական ընտրություններում (փրայմերիզ) իր տեղը զիջել էր Հիլարի Քլինթոնին։ Նախկին պետքարտուղարը 2008թ-ին նույնպես մասնակցել է նախագահական ընտրապայքարին, սակայն անցկացված փրայմերիզում պարտվել էր Բարաք Օբամային։