Թուրք սպաների և դիվանագետների խումբը վախենում է վերադառնալ հայրենիք

ՆԱՏՕ-ի թուրք սպաների և դիվանագետների խումբը քաղաքական ապաստան է խնդրել Նորվեգիայի իշխանություններից։ Այս մասին հայտնում է Verdens Gang լրատվականը։

Աղբյուրի համաձայն՝ այդ մարդիկ ծառայում են Նորվեգիայում նախորդ աշնանից։ Թուրքիայի իշխանությունները նրանց խնդրել են վերադառնալ հայրենիք, որպեսզի հարցաքննվեն հուլիսի 15-ի հեղաշրջման փորձի գործով։ Սպաների և դիվանագետների խումբը հրաժարվել է մեկնել Թուրքիա՝ պատճառաբանելով, որ վախենում են իրենց կյանքի համար։

Աղբյուրը նշում է, որ նրանք արդեն դիմել են Նորվեգիայի միգրացիոն կենտրոն և ոստիկանության՝ օտարերկրյա քաղաքացիների գործերով զբաղվող բաժանմունք։ Նրանք պնդում են, որ որևէ կապ չունեն հեղաշրջման փորձի հետ։

«Այս պահին հնարավոր չէ վերադառնալ։ Ես այստեղ հեռացվել եմ աշխատանքից, իսկ իմ անձնագիրը կորցրել է ուժը։ Եթե ես վերադառնամ Թուրքիա, ինձ կձերբակալեն և բռնության կենթարկեն. հնարավոր է նաև՝ կեղծ մեղադրանք առաջադրեն։ Թուրքական բանտերում մարդիկ մահանում են անհայտ հանգամանքներում», - ասել է Նորվեգիայից ապաստան խնդրող խմբի անդամներից մեկը։

Նշենք, որ նախորդ տարվա հուլիսի 15-ին Թուրքիայում զինվորականները հեղաշրջման փորձ են կազմակերպել։  Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։