ԻՊ-ի զինյալները ավերել են Պալմիրայի մի շարք հուշարձաններ

Հունվարի 20-ին «Իսլամական պետություն» ահաբեկչական խմբավորման զինյալներն ավերել են սիրիական Պալմիրայի հնագույն ամֆիթատրոնը և մի շարք ճարտարապետական հուշարձաններ։ Այս մասին հայտնում է Սիրիայի հանրային հեռուստաընկերությունը։

Աղբյուրի հավաստմամբ՝ ահաբեկիչները մահապատժի են ենթարկել 12 մարդու, որոնք գերի էին ընկել քաղաքի գրավման ժամանակ։

Սիրիայի նախագահ Բաշար ալ-Ասադը հայտարարել է, որ ահաբեկիչները քաղաքի նկատմամբ վերահսկողությունը վերականգնել են ԱՄՆ-ի օգնությամբ։

Նշենք, որ Իսլամական պետության ահաբեկիչները հարձակվել էին Պալմիրայի վրա նախորդ տարվա դեկտեմբերի 9-ին։ Նրանք նաև փորձել էին գրավել քաղաքի մոտակայքում գտնվող նաֆթահանքերը և ռազմական օդանավակայանը։ Դեկտեմբերի 11-ի երեկոյան կառավարական զորքերը նահանջել են՝ թույլ տալով ահաբեկիչներին ամբողջական վերահսկողություն հաստատել քաղաքի նկատմամբ։

Պալմիրայում գտնվող բազմաթիվ հուշարձաններ ընգրկված են ՅՈՒՆԵՍԿՕ-ի համաշխարհային ժառանգության ցանկում։