Կայացավ Դոնալդ Թրամփի երդմնակալության արարողությունը
Հունվարի 20-ին ԱՄՆ-ի մայրաքաղաք Վաշինգտոնում կայացած արարողությանը Դոնալդ Թրամփը պաշտոնապես ստանձնեց նախագահի պաշտոնը։ Երդմնակալությանը ներկա էին ԱՄՆ-ի նախկին նախագահներ Ջիմի Քարթերը, Բիլ Քլինթոնը, Ջորջ Բուշը և, իհարկե, Բարաք Օբաման, որը պետք է իշխանությունը փոխանցեր նոր նախագահին։
«Ես՝ Դոնալդ Ջոն Թրամփս, հանդիսավոր կերպով երդվում եմ, որ հավատարմորեն իրականացնելու եմ նախագահական պարտավորություններս և իմ ուժերի սահմաններում պահպանելու եմ Միացյալ Նահանգների սահմանադրությունը։ Աստված ինձ օգնական», - ասել է Թրամփը երդման ավանդական խոսքերը՝ կրկնելով այն ԱՄՆ-ի Գերագույն դատարանի նախագահ Ջոն Ռոբերթսի հետևից։
Երդմանը հաջորդել է Թրամփի ելույթը, որը տևել է 17 րոպե։ Իր ելույթում ԱՄՆ-ի 45-րդ նախագահը շնորհակալություն է հայտնել Բարաք Օբամային և նրա տիկնոջը իշխանության փոխանցման ընթացքում իրեն աջակցելու համար։
«Այս պահին կարևոր չէ, թե որ կուսակցությունն է եկել իշխանության։ Հունվարի 20-ը կհիշվի որպես այն օրը, երբ ժողովուրդը երկրի կառավարումը կրկին վերցրեց իր ձեռքը», - ասել է Թրամփը։
Անդրադառնալով երկրի տնտեսական վիճակին՝ ԱՄՆ-ի 45-րդ նախագահը նշել է. «Մենք շատ մեծ գումարներ ենք վատնում արտասահմանում։ Այդ կերպ մենք ուրիշ երկրները դարձնում ենք հարուստ, իսկ մեզ մոտ գործարաններ են փակվում, և միջին դասի մարդկանց գումարները դուրս է հանվում Ամերիկայից՝ տարածվելով ամբողջ աշխարհում։ Բայց սա արդեն անցյալում է. մենք հիմա առաջ ենք շարժվելու»։
Խոսելով ահաբեկչության դեմ պայքարի մասին՝ Թրամփը խոստացավ երկրի երեսից ամբողջությամբ ջնջել ահաբեկիչներին, - «Մենք կհզորացնենք մեր դաշինքները, կկազմենք նորերը, կմիավորենք ողջ քաղաքակիրթ աշխարհն ու կոչնչացնենք արմատական իսլամական ահաբեկչությունը»։
Ելույթի վերջում նա կրկին հնչեցրել է իր կարգախոսը. «Մենք Ամերիկան նորից հզոր կդարձնենք» ։