Լրագրողներն աշխարհի ամենաանարդար մարդկանցից են. Թրամփ

Հունվարի 21-ին ԱՄՆ-ի նախագահ Դոնալդ Թրամփն այցելել է Կենտրոնական հետախուզական վարչության շտաբակայան, որտեղ ելույթ է ունեցել գերատեսչության աշխատակազմի առջև, գրում է Washington Post-ը։

«Ոչ ոք չունի այնպիսի ուժեղ զգացմունքներ հետախուզական համայնքի նկատմամբ, ինչպես ես։ Ոչ ոք չի հարգում ձեզ ավելի շատ, քան ես», - ասել է Թրամփը՝ կարևորելով նրանց դերն ազգային անվտանգության հարցում։

ԱՄՆ-ի նախագահի խոսքով՝ Կենտրոնական հետախուզական վարչության աշխատանքը կարևոր է հատկապես ահաբեկչության դեմ պայքարի հարցում։ Անդրադառնալով «Իսլամական պետություն» ահաբեկչական խմբավորմանը՝ Թրամփն ասել է. «Մենք պետք է ազատվենք ԻՊ-ից։ Ծայրահեղական իսլամական ահաբեկչությունը պետք է ջնջվի երկրի երեսից։ Դա չարիք է»։

ԱՄՆ-ի 45-րդ նախագահը խոսել է նաև մամուլի մասին՝ պնդելով, որ ԶԼՄ-ները դիտավորյալ փորձում են սեպ խրել իր և հետախուզական ծառայությունների միջև։

«Ես պատերազմում եմ ԶԼՄ-ների դեմ։ Լրագրողերն աշխարհի ամենաանարդար մարդկանցից են», - ասել է Թրամփը։ Նա որպես օրինակ նշել է իր երդմնակալության արարողության մասնակիցների թվի մասին մամուլի հրապարակած տվյալները, ըստ որի, այն չէր գերազանցում 250 հազարը։ Թրամփի պնդմամբ՝ այդ թիվը հասնում էր 1-1,5 միլիոնի։