ԱՄՆ-ն Վաշինգտոնից պատվիրակություն չի ուղարկի Ղազախստան Սիրիայի հարցով բանակցություններին

ԱՄՆ-ն Վաշինգտոնից պատվիրակություն չի ուղարկի Աստանա սիրիական ճգնաժամի կարգավորման հարցով հունվարի 23-24-ին կայանալիք բանակցություններին մասնակցելու համար։ Աստանայում ԱՄՆ-ն կներկայացնի Ղազախստանի դեսպան Ջորջ Քրոլը։ Այս մասին գրում է ՏԱՍՍ-ը՝ հղում կատարելով ԱՄՆ պետքարտուղարության պաշտոնական ներկայացուցիչ Մարկ Տոների հայտարարությանը։

«Մենք ողջունում և գնահատում ենք, որ Ղազախստանը մեզ հրավիրել է որպես դիտորդ բանակցություններին մասնակցելու։ Հաշվի առնելով նախագահի երդմնակալության արարողությունը և անցումային շրջանի անհետաձգելի պահանջները՝ Վաշինգտոնի պատվիրակությունը չի մասնակցի Աստանայում կայանալիք բանակցություններին։ Միացյալ Նահանգները կներկայացնի Ղազախստանում մեր դեսպանը», - հայտարարել էր Մարկ Տոները։

ԱՄՆ-ի արտաքին գերատեսչության պաշտոնական ներկայացուցիչը հաստատել է, որ ԱՄՆ-ի կառավարությունը Ղազախստանի Հանրապետության կառավարությունից հրավեր էր ստացել մասնակցելու հունվարի 23-ին Աստանայում կայանալիք բանակցություններին։

Ավելի վաղ Ռուսաստանի Դաշնության նախագահի մամուլի խոսնակ Դմիտրի Պեսկովը հայտարարել էր, որ Ռուսաստանը կողջունի ԱՄՆ-ի մասնակցությունը Աստանայի բանակցություններին։

«Սիրիայի հարցում ոչ թե գործարք է պետք, այլ համագործակցություն», - ասել էր Պեսկովը՝ պատասխանելով Սիրիայի հարցում ռուս-ամերիկյան հնարավոր համագործակցության մասին հարցին, որից հետո ավելացրել էր, - «Ակնհայտ է, որ Սիրիայի հարցում առանց ԱՄՆ-ի մասնակցության հնարավոր չէ հասնել կառուցողական կարգավորման»։

Սիրիական ճգնաժամի կարգավորման հարցով Աստանայի բանակցությունները կկայանան առաջիկա երկուշաբթի, սակայն մասնակիցների վերջնական ցանկը դեռևս հայտնի չէ։