Աստանայի հանդիպումը միջանկյալ փուլ է. Շթայնմայեր

Սիրիական ճգնաժամի քաղաքական կարգավորումը պետք է փնտրել Ժնևում. Աստանայի հանդիպումը միջանկյալ փուլ է։ Բեռլինում կայացած մամուլի ասուլիսի ժամանակ այսպիսի կարծիք է հայտնել Գերմանիայի արտաքին գործերի նախարար Ֆրանկ-Վալտեր Շթայնմայերը. գրում է ՏԱՍՍ-ը։

«Ես կարծում եմ, որ Աստանայի բանակցությունները միջանկյալ փուլ են։ Ինչպես տեսնում եք՝ հանդիպումը, մեծ հաշվով, նվիրված է ռազմական ոլորտում Ռուսաստանի, Թուրքիայի, Իրանի և մյուս մասնակիցների համագործակցությանը», - հայտարարել է Շթայնմայերը և ավելացրել, որ Գերմանիան մասնակցում է Աստանայի հանդիպմանը որպես դիտորդ։

«Սիրիական հարցի քաղաքական կարգավորումը պետք է փնտրել միայն Ժնևում։ Խաղաղության հասնելու համար անհրաժեշտ է, որ բանակցությունների սեղանի շուրջ նստեն տարածաշրջանային խաղացողները, հարևանները, որոնք կարևոր դեր են խաղում այս հակամարտությունում», - ասել է Գերմանիայի արտգործնախարարը։

Նրա խոսքով՝ Սիրիան առաջվա պես ունի հումանիտար մեծ օգնության կարիք։