Օբամայի վարչակազմը 221 միլիոն դոլար է փոխանցել Պաղեստինին

ԱՄՆ նախկին նախագահ Բարաք Օբամայի վարչակազմը պաշտոնավարման վերջին ժամերին 221 միլիոն դոլար է փոխանցել Պաղեստինյան ինքնավարությանը։ Այս մասին հայտնում է Associated Press-ը։

Աղբյուրի հավաստմամբ՝ հունվարի 20-ի առավոտյան՝ Դոնալդ Թրամփի՝ նախագահի պաշտոնը ստանձնելուց ժամեր առաջ, Օբամայի վարչակազմն իր մտադրության մասին պաշտոնապես տեղեկացրել է Կոնգրեսին՝ գրավոր ծանուցմամբ։ Դրանից մեկ օր առաջ նախկին պետքարտուղար Ջոն Քերին օրենսդիրներին հայտնել է վարչակազմի որոշման մասին։

Աղբյուրը նշում է, որ Օբամայի այս որոշումը կարող է բացասական արձագանք գտնել Թրամփի և նրա վարչակազմի շրջանում։ Նախընտրական քարոզարշավի ժամանակ Թրամփը բազմիցս հայտնել էր Իսրայելի հետ հարաբերությունները կարգավորելու իր պատրաստակամության մասին։

Նշվում է, որ Թրամփն Իսրայելի վարչապետ Բենյամին Նեթանյահուին արդեն հրավիրել է Սպիտակ տուն։ Նա նաև հավանություն է տվել Իսրայելում ԱՄՆ-ի դեսպանատան՝ Թել Ավիվից Երուսաղեմ տեղափոխմանը։