Մեքսիկայի նախագահը դատապարտել է Թրամփի՝ իրենց սահմանին պատ կառուցելու մասին որոշումը
Մեքսիկան չի վճարի ԱՄՆ-ի հետ սահմանին պատի կառուցման համար։ Այս մասին հայտարարել է Մեքսիկայի նախագահ Էնրիկե Պենյա Նիետոն. գրում է ՏԱՍՍ-ը։
«Ափսոսանք եմ հայտնում և դատապարտում եմ ԱՄՆ-ի նախագահի որոշումը։ Ես մեկ անգամ չէ, որ հայտարարել եմ՝ ՄԵքսիկան չի վճարի ոչ մի պատի համար։ Որպես նախագահ՝ ես պատասխանատվություն եմ ստանձնում պաշտանել Մեքսիկայի և մեր բնակիչների շահերը», - հայտարարել է Նիետոն՝ ավելացնելով, որ Թրամփն այս որոշումը կայացրեց այն ժամանակ, երբ ԱՄՆ-ն և Մեքսիկան սկսել էին նոր բանակցություններ առևտրի, ներդրումների, միգրացիայի, անվտանգության և համագործակցության նոր կանոնների շուրջ։
Այս պահին Մեքսիկայի արտաքին գործերի և էկոնոմիկայի նախարարների գլխավորած պատվիրակությունը Վաշինգտոնում է, սակայն ԱՄՆ-ի նոր վարչակազմի հետ հանդիպման արդյունքների մասին տեղեկատվություն դեռևս չի հաղորդվել։
Հունվարի 31-ին ԱՄՆ-ում նախատեսված է Մեքսիկայի նախագահի հանդիպումը Դոնալդ Թրամփի հետ, սակայն դեռ պարզ չէ՝ հանդիպումը կկայանա, թե ոչ։
Դոնալդ Թրամփն ավելի վաղ հայտարարել էր, որ Մեքսիկայի հետ սահմանին 15 մետր բարձրությամբ պատ պետք է կառուցվի, որը կարժենա 10-12 միլիարդ դոլար։