Սիրիայի հյուսիսում շարունակվում են մարտերը Թուրքիայի Զինված ուժերի և Իսլամական պետության միջև

Հունվարի 29-ին Սիրիայի էլ Բաբ քաղաքում Թուրքիայի Զինված ուժերի և Իսլամական պետության միջև մարտերի ընթացքում մեկ թուրք զինվոր է սպանվել։ Այս մասին հաղորդում է haber7.com-ը։

Աղբյուրի հավաստմամբ՝ թուրքական զինուժի ևս երկու զինծառայող վիրավորվել են։

Demokrathaber-ը նշում է, որ օգոստոսին սկսված «Եփրատի վահան» գործողության շրջանակներում տեղի ունեցած մարտերի հետևանքով թուրքական զինուժը կրել է ընդհանուր 54 կորուստ։  

Նախորդ տարվա դեկտեմբերի 23-ին Թուրքիայի նախագահ Ռեջեփ Թայիփ Էրդողանը հայտարարել էր, որ էլ Բաբի համար մղվող պայքարում թուրքական զինուժը մեծ հաջողություններ է գրանցում։ Էրդողանի՝ դեկտեմբերի 27-ին արած հայտարարության մեջ նշվում էր, որ քաղաքն արդեն ամբողջովին շրջափակված է։

Նշենք, որ նախորդ տարվա օգոստոսի 24-ից Թուրքիայի Զինված ուժերը «Սիրիայի ազատ բանակի» օժանդակությամբ իրականացնում են «Եփրատի վահան» ռազմական գործողությունը, որի նպատակն է Սիրիայի հյուսիսային Ջերաբլուս քաղաքն ազատագրել ԻՊ գրոհայիններից: Այս գործողությամբ Թուրքիայի իշխանությունները ցանկանում են անվտանգության գոտի ստեղծել Սիրիայի հյուսիսային շրջաններում: