Հերքվել են Սիրիայի նախագահի առողջական վիճակի վատացման մասին լուրերը
Բաշար ալ-Ասադի առողջական վիճակը լավ է, և նա սովորականի պես կատարում է իր պատրականությունները։ Այս մասին հայտարարել է Սիրիայի նախագահի մամուլի ծառայությունը. գրում է SANA լրատվական գործակալությունը։
Սիրիայի նախագահի մամուլի ծառայության հայտարարության մեջ ամբողջովին հերքվել են Ասադի առողջական վիճակի վատացման մասին լուրերը։
«Սիրիացի ժողովուրդն արդեն իմունիտետ է ձեռք բերել նման կեղծ լուրերի նկատմամբ։ Այդպիսի սուտ տեղեկատվություններ տարածվում են պատերազմի առաջին իսկ օրվանից։ Դրանք այդ մարդկանց երևակայության արդյունքն են։ Այդպիսի լուրերին պետք է արհամարհանքով վերաբերվել», - ասվում է հայտարարության մեջ։
Հայտարարության մեջ ուշադրություն է հրավիրվում նաև այն փաստի վրա, որ Ասադի առողջական վիճակի վատացման մասին լուրերը սկսեցին տարածվել միայն այն ժամանակ, երբ կատարվում էին ռազմական և քաղաքական կարևոր իրադարձություններ։
Նշենք, որ ավելի վաղ արաբական մի շարք լրատվամիջոցներ գրում էին, որ Սիրիայի նախագահ Բաշար ալ-Ասադը գլխուղեղի կաթված (ինսուլտ) է ստացել և հոսպիտալացվել է։