WikiLeaks-ը հայտարարել է իրենց արխիվներում Ֆրանսիայի նախագահի թեկնածուների վերաբերյալ փաստաթղթերի առկայության մասին

Այսօր՝ փետրվարի 1-ին,  WikiLeaks-ը հայտարարել է, որ կայքի արխիվներում պահպանվում է մոտ 1100 փաստաթուղթ՝ Ֆրանսիայի նախագահի թեկնածու, Ֆրանսիայի «Ազգային ճակատ» կուսակցության առաջնորդ Մարին Լե Պենի վերաբերյալ։

«Ֆրանսիայի նախագահի թեկնածու Մարին Լե Պենի վերաբերյալ մեր արխիվներում կա 1138 փաստաթուղթ», - ասվում է WikiLeaks-ի թվիթերյան պաշտոնական էջում արված հայտարարության մեջ։

WikiLeaks-ի՝ նույն օրը արված մեկ այլ հայտարարության մեջ նշված է, որ արխիվներում պահպանվում է 3,630 փաստաթուղթ՝ Ֆրանսիայի նախկին վարչապետ, նախագահի թեկնածու Ֆրանսուա Ֆիյոնի վերաբերյալ, որի կնոջ անվան շուրջ խոշոր սկանդալ է հասունանում։

Անցկացված սոցհարցումների համաձայն՝ Մարին Լե Պենն, ամենայն հավանականությամբ, կհաղթի ընտրությունների առաջին փուլում, որը կայանալու է այս տարվա ապրիլի 23-ին։ Նույն հարցումները ցույց են տալիս, որ Լե Պենն, այնուամենայնիվ, ընտրությունների երկրորդ՝ մայիսի 7-ին կայանալիք փուլում իր տեղը կզիջի Ֆրանսիայի աջ պահպանողական հանրապետական կուսակցության ներկայացուցիչ, Ֆրանսիայի նախկին վարչապետ Ֆրանուա Ֆիյոնին, կամ Էկոնոմիկայի նախկին նախարար Էմանուել Մակրոնին։