Պորոշենկոն մտադիր է Ուկրաինայում հանրաքվե անցկացնել ՆԱՏՕ-ին անդամակցելու հարցով

Ուկրաինայի նախագահ Պետրո Պորոշենկոն մտադիր է հանրաքվե անցկացնել ՆԱՏՕ-ին անդամագրվելու հարցով։ Այս մասին Ուկրաինայի նախագահը հայտարարել է գերմանական Berliner Morgenрost թերթին տված հարցազրույցի ժամանակ, գրում է Ռիա Նովոստին։

«Չորս տարի առաջ Ուկրաինայի՝ ՆԱՏՕ-ին անդամագրվելուն կողմ էր բնակչության 16%-ը, իսկ հիմա՝ 54%-ը։ Որպես նախագահ ես առաջնորդվում եմ իմ ժողովրդի կամքով. ես հանրաքվե կանցկացնեմ ՆԱՏՕ-ին անդամագրվելու հարցով։ Եթե ուկրաինացիները կողմ լինեն, ամեն ինչ կանեմ, որպեսզի անդամագրվենք Հյուսիսատլանտյան դաշինքին», - ասել է Պորոշենկոն։

2014 թ. դեկտեմբերին Ուկրաինայի Գերագույն ռադան փոփոխություն էր մտցրել երկու օրենքում՝ հրաժարվելով երկրի «անդաշինք» կարգավիճակից։

ՆԱՏՕ-ի նախկին գլխավոր քարտուղար Անդերս Ֆոգ Ռասմուսենն ավելի վաղ հայտարարել էր, որ դաշինքին անդամակցելու համար Ուկրաինայից երկար ժամանակ կպահանջվի։

Փորձագետների կարծիքով՝ Ուկրաինան չի կարող անդամակցել ՆԱՏՕ-ին առաջիկա 20 տարիներին։ Մասնագետները նկատում են նաև, որ Դաշինքը չի ընդունում այն երկրներին, որոնք ունեն տարածքային կոնֆլիկտներ։