Ռուսաստանն ընդդիմությանն է հանձնել Սիրիայի նոր սահմանադրության նախագիծը
Մոսկվան սիրիական ընդդիմությանն է հանձնել Սիրիայի նոր սահմանադրության նախագիծը։ Այս մասին հայտարարել է Աստանայի հանդիպմանը ռուսական պատվիրակության ղեկավար Ալեքսանդր Լավրենտևը. գրում է Ռիա Նովոստին։
«Հատկապես ցանկանում եմ շեշտել, որ մենք դա արել ենք միայն գործընթացն արագացնելու նպատակով՝ ոչ մի կերպ չմիջամտելով սահմանադրության ընդունմանը, կամ դրա քննարկումներին», - ասել է Լավրենտևն՝ ավելացնելով, որ սահմնադրության նախագիծը կազմել են միայն ռուս մասնագետները։
Նշենք, որ սիրիական ճգնաժամի կարգավորման հարցով հունվարի 23-24-ին Ղազախստանի մայրաքաղաք Աստանայում կայացած հանդիպման արդյունքում Ռուսաստանը, Իրանը և Թուրքիան որոշում են կայացրել Սիրիայում հրադադարի ռեժիմի հսկման եռակողմ մեխանիզմ ստեղծել։
Սիրիական ընդդիմության պատվիրակության ղեկավար Մուհամմեդ Ալյուշը հատարարել էր, որ գնալով աճում է Ռուսաստանի դերը Սիրիայում խաղաղության հաստատման հարցում։ Նա նաև հույս էր հայտնել, որ Մսկվան կշարունակի դրական ազդեցություն ունենալ «արդար քաղաքական գործընթացի վրա»։