Պատժամիջոցները չեն չեղարկվի մինչև Ղրիմը չվերադառնա Ուկրաինայի կազմ. ՄԱԿ-ում ԱՄՆ ներկայացուցիչ

Ռուսաստանի նկատմամբ կիրառվող պատժամիջոցները կգործեն այնքան ժամանակ, մինչև Ղրիմը չվերադառնա Ուկրաինայի կազմ։ Այս մասին ՄԱԿ-ի Անվտանգության խորհրդի փետրվարի 2-ին կայացած նիստի ժամանակ հայտարարել է ՄԱԿ-ում ԱՄՆ-ի նոր ներկայացուցիչ Նիկկի Հեյլին. գրում է ՏԱՍՍ-ը։

«Ղրիմն Ուկրաինայի մասն է։ Մեր կողմից կիրառվող պատժամիջոցները կապված են Ղրիմի հարցի հետ։ Պատժամիջոցները չեն չեղարկվի մինչև Ռուսաստանը թերակղզին չվերադարձնի Ուկրաինային», - ասել է Հեյլին։

Նրա խոսքով՝ ԱՄՆ-ն այժմ ցանկանում է կարգավորել հարաբերությունները Ռուսաստանի հետ։  

2014թ-ին ԱՄՆ-ն և Եվրոպական Միության երկրները սկսեցին տնտեսական պատժամիջոցներ կիրառել Ռուսաստանի նկատմամբ՝ այն կապելով Ղրիմի ՌԴ-ին միանալու և Ուկրաինայի հարավարևելքում տիրող իրավիճակի հետ։ Սկզբում անհատական պատժամիջոցներ էին կիրառվում ֆիզիկական անձանց նկատմամբ, իսկ հետո արդեն դրանց մասշտաբները մեծացան՝ սահմանափակելով տնտեսության կոնկրետ ոլորտներ։

Ըստ Արևմուտքի՝ պատժամիջոցները չեղարկելու համար Ռուսաստանից պահանջվում է կատարել Մինսկի համաձայնագրի դրույթները։ Եվրոպական մի քանի երկիր՝ Հունգարիան, Հունաստանը, Կիպրոսը, Իսպանիան և Իտալիան, կողմ են հանդես գալիս Մոսկվայի հետ հարաբերությունները վերականգնելուն։

Կրեմլն անհեթեթություն է որակում պատժամիջոցների չեղարկումը Մինսկի համաձայնագրի դրույթների կատարման հետ կապելը, քանի որ իրեն չի համարում հակամարության կողմ։