Չուրկինն ամերիկացի գործընկերոջը պատասխանել է՝ մեջբերում կատարելով ԱՄՆ-ի սահմանադրությունից

ՄԱԿ-ում Ռուսաստանի մշտական ներկայացուցիչ Վիտալի Չուրկինը, մեկնաբանելով պատժամիջոցների չեղարկման պայմանների վերաբերյալ ամերիկացի գործընկերոջ հայտարարությունը, մեջբերում է կատարել ԱՄՆ-ի սահմանադրությունից։ Այս մասին գրում է Ռիա Նովոստին։

«Չի կարելի մոռանալ, որ ԱՄՆ-ի սահմանադրության մեջ կան հրաշալի խոսքեր՝ «Մենք` ժողովուրդը»։ Ղրիմի ժողովուրդը հստակ կերպով իր կամքն արտահայտել է  հանրաքվեի ժամանակ», - ասել է Չուրկինը։

Նշենք, որ ՄԱԿ-ի Անվտանգության խորհրդի փետրվարի 2-ին կայացած նիստի ժամանակ ՄԱԿ-ում ԱՄՆ ներկայացուցիչ Նիկի Հեյլին հայտարարել էր, որ հակառուսական պատժամիջոցները կչեղարկվեն միայն այն դեպքում, եթե Ղրիմը վերադարձվի Ուկրաինային։

Ռուսական լրատվամիջոցները հայտնում են, որ այսօր՝ փետրվարի 3-ին, նախատեսված է Չուրկինի և Հեյլիի հանդիպումը։ Չուրկինի խոսքով՝ իրենք պատրաստվում են խոսել «ամեն ինչից, կյանքից»։

2014թ-ին ԱՄՆ-ն և Եվրոպական Միության երկրները սկսեցին տնտեսական պատժամիջոցներ կիրառել Ռուսաստանի նկատմամբ՝ այն կապելով Ղրիմի ՌԴ-ին միանալու և Ուկրաինայի հարավարևելքում տիրող իրավիճակի հետ։ Սկզբում անհատական պատժամիջոցներ էին կիրառվում ֆիզիկական անձանց նկատմամբ, իսկ հետո արդեն դրանց մասշտաբները մեծացան՝ սահմանափակելով տնտեսության կոնկրետ ոլորտներ։

Ըստ Արևմուտքի՝ պատժամիջոցները չեղարկելու համար Ռուսաստանից պահանջվում է կատարել Մինսկի համաձայնագրի դրույթները։ Եվրոպական մի քանի երկիր՝ Հունգարիան, Հունաստանը, Կիպրոսը, Իսպանիան և Իտալիան, կողմ են հանդես գալիս Մոսկվայի հետ հարաբերությունները վերականգնելուն։

Կրեմլն անհեթեթություն է որակում պատժամիջոցների չեղարկումը Մինսկի համաձայնագրի դրույթների կատարման հետ կապելը, քանի որ իրեն չի համարում հակամարության կողմ։