Մենք հույս ունենք խորացնել Իրանի հետ ունեցած գործընկերային հարաբերությունները. Պեսկով

Ռուսաստանն Իրանի հետ ունի գործընկերային, ջերմ հարաբերություններ և հույս ունի ապագայում խորացնել կապերը նաև առևտրատնտեսական ոլորտում։ Այս մասին լրագրողների հետ զրույցում հայտարարել է ՌԴ նախագահի մամուլի խոսնակ Դմիտրի Պեսկովը։

Պեսկովը, պատասխանելով լրագրողների հարցին, թե արդյոք Կրեմլը համաձայն է Իրանի՝ ահաբեկչական երկիր լինելու մասին Թրամփի հնչեցրած մտքին, ասել է. «Մենք դեմ ենք նման ձևակերպումներին»։

ՌԴ նախագահի մամուլի խոսնակը նշել է, որ հեռանկարային չէ խոսել Իսլամական պետության դեմ Մոսկվայի և Վաշինգտոնի համատեղ պայքարի մասին՝ այդ համատեքստում շրջանցելով Իրանի գործոնը։

«Դուք գիտեք, որ Ռուսաստանը և Իրանն ունեն գործընկերային հարաբերություններ։ Մենք համագործակցում ենք մի շարք հարցերում, գնահատում ենք արևտրատնտեսական ոլորտում ունեցած մեր հարաբերությունները և հույս ունենք, որ դրանք ավելի կխորանան»,- ասել է Դմիտրի Պեսկովը։

Հիշեցնենք, որ Դոնալդ Թրամփը Fox News հեռուստաալիքին տված հարցազրույցի ժամանակ Իրանը համարել էր «ահաբեկչական համար առաջին պետություն»։