Օբաման ինձ դուր է գալիս. Թրամփ
ԱՄՆ-ի նախագահ Դոնալդ Թրամփը հայտարարել է, որ «իրեն դուր է գալիս նախկին նախագահ Բարաք Օբաման»։ Այս մասին ԱՄՆ-ի հանրապետական նախագահը հայտարարել է Fox News հեռուստաալիքի փետրվարի 6-ի եթերում։
Խոսելով նախկին նախագահի հետ ունեցած հարաբերությունների մասին՝ Թրամփն ասել է. «Մենք լավ հարաբերությունների մեջ ենք։ Նա ինձ դուր է գալիս։ Չգիտեմ՝ կխոստովանի նա, թե ոչ, բայց ես էլ իրեն եմ դուր գալիս»։
«Մենք միմյանց մասին սարսափելի բաներ էինք ասում, բայց հետո նստեցինք մեքենա և գնացինք Փենսիլվանիա պողոտա՝ բառ անգամ չխոսելով այդ մասին։ Քաղաքականությունը հետաքրքիր բան է», - պատմել է Թրամփը։
Նախընտրական քարոզարշավի ժամանակ Թրամփը մեկ անգամ չէ, որ Օբամային անվանել է ԱՄՆ-ի պատմության վատագույն նախագահ՝ համարելով, որ վերջինիս վարած քաղաքականությունն «իսկական աղետ է» երկրի համար։ Օբաման էլ, իր հերթին, մեկ անգամ չէ, որ կասկածի տակ է դրել Թրամփի նախագահական որակները։ Նա նշում էր, որ Թրամփի խառնվածքի մարդը չի կարող ղեկավարել Սպիտակ տունը։