ՌԴ-ի և ԱՄՆ-ի համագործակցությունն օգուտ կբերի ամբողջ աշխարհին. Ասադ

Սիրիայի նախագահ Բաշար ալ-Ասադը կարծում է, որ Մոսկվայի և Վաշինգտոնի համագործակցությունը օգուտ կբերի ինչպես Սիրիային, այնպես էլ՝ ամբողջ աշխարհին։ Այս մասին Ասադը հայտարարել է բելգիական ԶԼՄ-ներին տված հարցազրույցի ժամանակ, հայտնում է սիրիական SANA լրատվական գործակալությունը։

Ասադի խոսքով՝ դեռ վաղ է ասել՝ Թրամփի վարչակազմը պատրաստ է այդպիսի համագործակցության, թե ոչ։

«Մենք Թրամփից բազմաթիվ խոստումներ ենք լսել նախընտրական քարոզարշավի ժամանակ և դրանից հետո։ Նա ասում է, որ ահաբեկչության՝ հատկապես Իսլամական պետության դեմ պայքարը նրա առաջնահերթություններից է։ Մենք դա ասում ենք արդեն վեց տարի։ Կարծում եմ՝ հույսեր կան, սակայն դեռ վաղ է գործնական առումով ինչ-որ բանի սպասել», - ասել է Սիրիայի նախագահը։

Նա կարծում է, որ խաղաղության հաստատումն առաջին հերթին կապված է զինված խմբավորումներին տրամադրվող աջակցության դադարեցման և սիրիացիների միջև երկխոսության շարունակման հետ։ Սիրիայի առաջնորդը դրական է գնահատել Աստանայի հանդիպման առաջին փուլի արդյունքները։

«Մեր պարտքն է պաշտպանել սիրիացի ժողովրդին ահաբեկիչներից, որոնք հարձակվում են խաղաղ բնակչության վրա, սպանում են նրանց, ոչնչացնում են ամեն ինչ այս երկրում», - ասել է Ասադը։ Նրա խոսքով՝ պետությունը պետք է գործի դնի ունեցած բոլոր միջոցները «Իսամական պետության», «Ջաբաթ ալ-Նուսրայի» և «Ալ-Քաիդայի» հետ կապված մյուս բոլոր ահաբեկչական խմբավումների դեմ պայքարելու համար։