Էլ Բաբում ռուսական ռազմական օդանավի հարվածից թուրք զինվորներ են սպանվել
Ռուսաստանի ռազմական ինքնաթիռը ավիահարված է հասցրել սիրիական Էլ Բաբ քաղաքի մոտակայքում գտնվող թուրքական ռազմական հենակետին։ Այս մասին հայտնում է թուրքական «Հյուրիյեթ» լրատվականը՝ հղում կատարելով Թուրքիայի Զինված ուժերի Գլխավոր շտաբի տարածած հաղորդագրությանը։
Աղբյուրի փոխանցմամբ՝ փետրվարի 9-ի առավոտյան Ռուսաստանի Դաշնության Օդատիեզերական ուժերի ինքնաթիռը Իսլամական պետության դիրքերը ռմբակոծելու ժամանակ սխալմամբ հարվածել է մոտակայքում գտնվող թուրքական հենակետերից մեկին։ Տեղի ունեցածի հետևանքով զոհվել է 3 թուրք զինծառայող, վիրավորվել է՝ 11-ը։
«Հյուրիյեթը» հայտնում է, որ ՌԴ նախագահ Վլադիմիր Պուտինը հեռախոսազրույց է ունեցել Ռեջեփ Թայիփ Էրդողանի հետ՝ իր ափսոսանքը հայտնելով տեղի ունեցածի կապակցությամբ։
Նույն կապակցությամբ հեռախոսազրույց են ունեցել նաև երկու երկրների Զինված ուժերի Գլխավոր շտաբի պետերը։