Սպիտակ տունը հետաքննում է, թե որտեղից են հրապարակվում Թրամփի՝ մյուս երկրների առաջնորդների հետ հեռախոսազրույցների մանրամասները

ԱՄՆ-ի նախագահի վարչակազմն ուսումնասիրում է, թե որտեղից են մամուլում հայտնվում Թրամփի և մյուս երկրների առաջնորդների հեռախոսազրույցների մանրամասները։ Այս մասին հայտարարել է Սպիտակ տան պաշտոնական ներկայացուցիչ Շոն Սփայսերը։

«Մենք ուսումնասիրում ենք իրավիճակը, և այն մեզ անհանգստություն է պատճառում», - Սփայսերի խոսքերը մեջբերում է The Hill պարբերականը։ Նրա խոսքով՝ տեղեկատվության արտահոսքը գործող կարգի և օրենքի խախտում է։

Սպիտակ տան ներկայացուցիչն, այնուամենայնիվ, չի մանրամասնել, թե կոնկրետ ինչ ուսումնասիրություն է կատարվում։ Նա նշել է, ոչ ԱՄՆ-ի նախագահն անձամբ անհանգստացած է ստեղծված իրավիճակով։ «Իհարկե, նա անհագստացած է։ Փաստը, որ նա չի կարող բանակցություններ վարել առանց տեղեկատվության արտահոսքի, մտահոգիչ է», ասել է նա։

Ավելի վաղ Ռոյթերս լրատվականը հայտնել էր, որ Թամփի և Պուտինի՝ վերջերս կայացած հեռախոսազրույցի ժամանակ ԱՄՆ-ի նախագահն անհաջող էր համարել «Ռազմավարական հարձակողական զինատեսակների սահմանափակման մասին» ռուս-ամերիկյան պայմանագիրը (СНВ-3), որն ուժի մեջ էր մտել 2011 թվականին։ Հերթական ճեպազրույցի ժամանակ Սփայսերը հրաժարվել էր անդրադառնալ այդ թեմային՝ նշելով, որ դա երկու երկրների առաջնորդների անձնական խոսակցությունն է։

ԶԼՄ-ները հաղորդել էին նաև, որ Թրամփը կոշտ զրույց է ունեցել Ավստրալիայի վարչապետի և Մեքսիկայի նախագահի հետ։ Սպիտակ տունն ավելի ուշ հերքել էր այս տեղեկատվությունը։