«Եփրատի վահան» գործողության վերջնական նպատակը Ռաքքան ԻՊ զինյալներից ազատագրելն է. Էրդողան

Փետրվարի 12-ին Թուրքիայի նախագահ Ռեջեփ Թայիփ Էրդողանը Ստամբուլում ունեցած ելույթի ժամանակ հայտարարել է, որ Թուրքիայի Զինված ուժերը և սիրիական ընդդիմությունն արդեն մտնում են Էլ Բաբ, սակայն իրենց վերջնական նպատակը Ռաքքան ԻՊ զինյալներից ազատագրելն է։

«Այժմ Էլ Բաբը շրջափակման մեջ է մեր և «Սիրիայի ազատ բանակի» ջոկատների կողմից։ Արդեն կարողանում ենք հասնել քաղաքի կենտրոն։ Իսլամական պետության ահաբեկիչները հեռանում են, սակայն մենք կանգ չենք առնելու։ Մեր վերջնական նպատակը Ռաքքան ԻՊ-ից ազատագրել է։ Այդ քաղաքը նրանց հենակետն է», - ասել է Թուրքիայի նախագահը։

Նրա խոսքով՝ Էլ Բաբն ամբողջությամբ ազատագրելուց հետո այնտեղ կվերադառնա քաղաքի նախկին բնակչությունը։ «Մանբիջն, օրինակ, 90%-ով արաբական քաղաք է, բայց այնտեղ տեղաբնիկները չեն ապրում։ «Ազգային ինքնապաշտպանության ջոկատները» (YPG, Սիրիայի քրդեր- խմբ.) գրավել են քաղաքը։ Երբ այս քաղաքներն ազատագրվեն ԻՊ-ից և «ազգային ինքնապաշտպանության ջոկատներից», մարդիկ կկարողանան վերադառնալ իրենց բնկավայրերը», - ասել է Էրդողանը։

Նշենք, որ նախորդ տարվա օգոստոսի 24-ից Թուրքիայի Զինված ուժերը սիրիական ազատ բանակի օժանդակությամբ իրականացնում են «Եփրատի վահան» ռազմական գործողությունը, որի նպատակն է Սիրիայի հյուսիսային Ջերաբլուս քաղաքն ազատագրել ԻՊ գրոհայիններից: Այս գործողությամբ Թուրքիայի իշխանությունները ցանկանում են անվտանգության գոտի ստեղծել Սիրիայի հյուսիսային շրջաններում:

Հիշեցնեն, որ նախորդ տարվա նոյեմբերին Էրդողանը հայտարարել էր, որ Սիրիայի տարածքում թուրքական բանակի սկսած գործողության նպատակը Բաշար ալ-Ասադին իշխանությունից հեռացնելն է։