Թրամփի խորհրդականի հրաժարականը կապված է ՌԴ դեսպանի հետ ունեցած հեռախոսազրույցի հետ
Միացյալ Նահանգների նախագահի՝ ազգային անվտանգության հարցերով խորհրդական Մայքլ Ֆլինը հրաժարական է ներկայացրել։ Այս մասին գրում է Ռիա Նովոստին՝ հղում կատարելով Սպիտակ տան հայտարարությանը։ Հրաժարականը կապված է Ֆլինի և ԱՄՆ-ում ՌԴ դեսպան Սերգեյ Կիսլյակի միջև կայացած հեռախոսազրույցի և դրա շուրջ բարձրացած աղմուկի հետ։
Աղբյուրի փոխանցմամբ՝ Ֆլինն ընդունում է, որ ինքը փոխնախագահ Մայք Փենսին և վարչակազմի մյուս անդամներին ակամայից տվել է ոչ ամբողջական տեղեկատվություն ռուս դեսպան Սերգեյ Կիսլյակի հետ հեռախոսազրույցի մասին։
Ֆլինի խոսքով՝ պաշտոնավարման կարճ ժամկետում նա բազմաթիվ հեռախոսազրույցներ է ունեցել օտարեկրյա դեսպանների և նախարարների հետ։ Նա նշել է, որ դա իշխանության փոխանցման կարգն է։
Նախորդ շաբաթ Washington Post պարբերականը գրել էր, որ դեկտեմբերի 29-ին, երբ Օբամայի վարչակազմը Ռուսաստանի նկատմամբ սահմանում էր հերթական պատժամիջոցները, ամերիկյան հատուկ ծառայությունները լսել են Կիսլյակի և ֆլինի հեռախոսազրույցը, որը, ըստ աղբյուրի, հենց պատժամիջոցների մասին էր։ Մեկ ամիս չանցած Ֆլինը դարձավ Թրամփի խորհրդականը։
Թրամփի հակառակորդները, առիթից օգտվելով, մեղադրում էին Ֆլինին օրենք խախտելու մեջ (օրենքն արգելում է մասնավոր անձանց զբաղվել դիվանագիտությամբ)։
Ռիա Նովոստին հայտնում է, որ Թրամփը լիովին աջակցում է Ֆլնին։
Դեմոկրատների խմբակցության ղեկավար Չակ Շումերը պահանջում է անկախ հետաքննություն անցկացնել՝ պարզելու Կիսլյակի և Ֆիլինի հեռախոսազրույցի մանրամասները։
Նախագահի՝ ազգային անվտանգության հարցերով խորհրդականի պաշտոննն այժմ ժամանակավորապես զբաղեցնում է Քիթ Քելոգը, որը նախընտրական քարոզարշավի ժամանակ եղել է Թրամփի՝ արտաքին քաղաքականության հարցերով խորհրդականը։