ՆԱՏՕ-ի գլխավոր քարտուղարը հանդիպում կունենա Սերգեյ Լավրովի հետ
ՆԱՏՕ-ի գլխավոր քարտուղար Յենս Սթոլթենբերգը պատրաստվում է հանդիպել ՌԴ արտգործնախարար Սերգեյ Լավրովի հետ Մյունխենում կայանալիք անվտանգության հարցերով համաժողովի շրջանակներում։ Այս մասին Սթոլթենբերգը հայտարարել է Դաշինքի անդամ երկրների պաշտպանության նախարարների հետ Բրյուսելում կայացած հանդիպումից հետո տեղի ունեցած մամուլի ասուլիսի ժամանակ. հայտնում է ՏԱՍՍ-ը։
«Ես կհանդիպեմ արտգործնախարար Լավրովի հետ Մյունխենում կայանալիք անվտանգության հարցրերով համաժողովի շրջանակներում։ Այդ հանդիպումը նպաստավոր հարթակ կլինի Ռուսաստանի հետ երկխոսության շարունակման համար։ Ես անհամբերությամբ սպասում եմ այդ հանդիպմանը»,- ասել է Սթոլթենբերգը։
ՆԱՏՕ-ի գլխավոր քարտուղարի խոսքով՝ ՌԴ արտգործնախարարի հետ կքննարկվեն մի շարք հարցեր, անդրադարձ կկատարվի Ուկրաինայում տիրող իրավիճակին։ Սթոլթենբերգը պատրաստակամություն է հայտնել նաև Լավրովի հետ քննարկել կողմերի միջև աճող լարվածությունը կանգնեցնելու հարցը։
Նշենք, որ անվտանգության հարցերով Մյունխենի համաժողովը կկայանա փետրվարի 17-19-ը։ Կազմակերպիչների հայտնած տվյալների համաձայն՝ դրան կմասնակցեն ավելի քան 500 քաղաքական գործիչ ամբողջ աշխարհից։
Հիշեցնենք, որ նախորդ տարվա նոյեմբերի 24-ին ՕքսՖորդի համալսարանում ունեցած ելույթի ժամանակ ՆԱՏՕ-ի գլխավոր քարտուղարը հայտարարել էր, որ Ռուսաստանը պետք է «հաշտվի» դաշինքի ընդլայնման հետ: