Մայքլ Ֆլինը պարզաբանումներ է տվել ՌԴ դեսպանի հետ ունեցած հեռախոսազրույցի մասին

ԱՄՆ-ի նախագահի՝ ազգային անվտանգության հարցերով նախկին խորհրդական Մայքլ Ֆլինը հայտարարել է, որ ՌԴ դեսպան Սերգեյ Կիսլյակի հետ զրուցելիս «չի անցել թույլատրելիի սահմանները»։  Այս մասին Ֆլինը խոսել է Daily Caller պարբերականին տված հարցազրույցի ժամանակ։

«Մեր խոսակցությունը չի եղել պատժամիջոցերի մասին։ Մենք խոսել ենք 35 ռուս դիվանագետի մասին, որոնք արտաքսվել էին ԱՄՆ-ից», - ասել է Ֆլինը։

Նա հայտարարել է նաև, որ իրեն շատ է անհանգստացնում փաստը, որ քաղաքական գործիչների գաղտնի զրույցների բովանդակությունները հաճախ հայտնվում է մամուլում։ Ֆլինի խոսքով՝ այսպիսի տեղեկատվության արտահոսքը հանցագործություն է։ «Դուք դա համարում եք արտահոսք, սակայն այն, իրականում, ամենածանր հանցագործություններից  է», - ասել է Թրամփի նախկին խորհրդականը։

Նշենք, որ փետրվարի 13-ին Դոնալդ Թրամփն ընդունել էր Մայքլ Ֆլինի ներկայացրած հրաժարականը։ Նախագահի՝ ազգային անվտանգության հարցերով խորհրդականի պաշտոնին ժամանակավորապես նշանակվել է Քիթ Քելոգը, որը նախընտրական քարոզարշավի ժամանակ եղել է արտաքին քաղաքականության հարցերով Թրամփի խորհրդականը։

Նախորդ շաբաթ Washington Post պարբերականը գրել էր, որ դեկտեմբերի 29-ին, երբ Օբամայի վարչակազմը Ռուսաստանի նկատմամբ սահմանում էր հերթական պատժամիջոցները, ամերիկյան հատուկ ծառայությունները լսել են Կիսլյակի և ֆլինի հեռախոսազրույցը, որը, ըստ աղբյուրի, հենց պատժամիջոցների մասին էր։