ԱՄՆ-ը վերանայում է արաբաիսրայելական հակամարտության վերաբերյալ իր մոտեցումը

ԱՄՆ-ն Մերձավոր Արևելքի խնդիրը լուծելիս չի հիմնվելու «երկու պետություն» սկզբունքի վրա։ Այս մասին հայտարարել է Սպիտակ տան ներկայացուցիչը։

Մինչև այժմ ԱՄՆ-ն հրեական և արաբական պետությունների ստեղծման ճանապարհով հակամարտության կարգավորումը համարում էր Մերձավոր Արևելքում իր արտաքին քաղաքականության անկյունաքարը:

«Եթե «երկու պետություն» սկզբունքը խաղաղություն չի բերում, ապա դա այն նպատակը չէ, որին ինչ-որ մեկն ուզում է հասնել։ Նպատակը խաղաղությունն է. կլինի դա «երկու պետություն» սկզբունքի հիման վրա (եթե կողմերը ցանկանան), թե մեկ այլ կերպ։ Մենք մտադիր ենք օգնել», - հայտարարել է Սպիտակ տան ներկայացուցիչը։

Նրա խոսքով՝ «երկու պետություն» սկզբունքի ձևակերպումն այնքան էլ հստակ չէ։ «Եթե հինգ մարդու հարցնենք, թե ինչ է «երկու պետություն» սկզբունքը, ապա կստանանք ութ տարբեր պատասխան», - ասել է ԱՄՆ-ի վարչակազմի ներկայացուցիչն՝ ավելացնելով, որ իրենք չեն ցանկանում թելադրել խաղաղության պայմաններ։

Նշենք, որ այսօր՝ փետրվարի 15-ին, Իսրայելի վարչապետ Բենիամին Նեթանյահուն Վաշինգտոնում հանդիպում կունենա ԱՄՆ-ի նախագահ Դոնալդ Թրամփ հետ։