Թիլերսոնին թույլ չեն տվել ավարտել ողջույնի խոսքը

ԱՄՆ պետքարտուղար Ռեքս Թիլերոսոնին թույլ չեն տվել ավարտել ողջույնի խոսքը ՌԴ արտգործնախարար Սերգեյ Լավրովի հետ հանդիպմանը, որը կայացել է G20-ի անդամ երկրների արտգործնախարարների գագաթնաժողովի շրջանակներում։ Այս մասին գրում է ՏԱՍՍ-ը։

«Շնորհակալ եմ, պարոն Լավրով։ Հաճելի է Ձեզ տեսնել», - ասել է Թիլերսոնը, որից հետո հանդիպման ամերիկացի կազմակերպիչները ընդհատել են պետքարտուղարի խոսքը՝ լրագրողներին խնդրելով հեռանալ դահլիճից։ Լրագրողները, սակայն, միանգամից չեն կատարել խնդրանքը։ Associated Press-ի թղթակից Մեթյու Լին հարցրել է Սերգեյ Լավրովին՝ Մոսկվան անհանգստացած է արդյոք Վաշինգտոնում տիրող քաղաքական «մակընթացությամբ», և դա ազդեցություն ունենում է երկու երկրների հարաբերությունների վրա, թե ոչ։

«Դուք պետք է հասկանաք, որ Ռուսաստանը չի խառնվում այլ պետությունների ներքին գործերին», - պատասխանել է ՌԴ արտգործնախարարը։

Սերգեյ Լավրովի և Ռեքս Թիլերսոնի բանակցություններն ընթանում են Գերմանիայի Բոն քաղաքում՝ G20-ի անդամ երկրների արտգործնախարարների հանդիպման շրջանակներում։ Ռուսական կողմը նշում է, որ հանդիպմանը քննարկվում է ԱՄՆ-ի նոր վարչակազմի հետ հետագա աշխատանքների կազմակերպման հարցը։