Սիրիայի կառավարական ուժերը վնասազերծել են իրենց օդային սահմանը հատած իսրայելական ռազմաօդային ուժերի ինքնաթիռները

Սիրիական բանակի պաշտոնական ներկայացուցիչները հայտարարում են, որ հարված են հասցրել իսրայելյան օդուժի 4 ռազմական ինքնաթիռներից մեկին, որոնք մտել էին Սիրիայի օդային սահման։ Այս մասին գրում է Ռիա Նովոստին։

Աղբյուրի փոխանցմամբ՝ դեպքը տեղի է ունեցել մարտի 16-ի լույս 17-ի գիշերը։

«Մեր հակաօդային պաշտպանության համակարգերը ֆիքսել և վնասազերծել են մեր օդային սահմանը խախտած ռազմական ինքնաթիռներից մեկին։ Հարված է հասցվել ևս մեկ ինքնաթիռի», - ասվում է Սիրիայի Զինված ուժերի հրամանատարության կողմից արված հայտարարության մեջ։

Նշվում է նաև, որ Իսրայելի օդուժի թիրախը սիրիական բանակի՝ Պալմիրայում գտնվող օբյեկտներն էին։

Ավելի վաղ իսրայելական ԶԼՄ-ները հայտնում էին, որ երկրի ռազմաօդային ուժերի ինքնաթիռները, որոնք գրոհում էին Սիրիայում գտնվող թիրախները, վնասազերծվել են Սիրիայի կառավարական ուժերի կողմից։ Իսրայելական աղբյուրները պնդում են, որ կիրառվել է խորհրդային արտադրության ՀՕՊ զենիթահրթռային Ս-200 համակարգ։