Թուրքիայի վարչապետը կոչ է անում Եվրամիությանը չմիջամտել իրենց ներքին գործերին

Թուրքիայի վարչապետ Բինալի Յըլդըրըմը Եվրամիությանն առաջարկել է չմիջամտել Անկարայի ներքին գործերին։ Յըլդըրըմն այս միտքն արտահայտնել է սահմանադրական փոփոխությունների հանրաքվեի քարոզարշավի շրջանակներում Քարաման քաղաքում ունեցած ելույթի ժամանակ. փոխանցում է թուրքական Haberler-ը։

«Թուրքիան ոչ մեկի հետ խնդիր չունի։ Ովքեր ցանկանում են նոր ճգնաժամի առջև կանգնեցնել մեզ, ասեմ, որ դա չի հաջողվի իրենց։ Եվրամիությունը 54 տարի է ձգձգում է Թուրքիայի անդամակցության հարցը։ Ես ԵՄ-ին զգուշացնում եմ՝ մի խառնվեք մեր երկրի ներքին գործերին, զբաղվեք ձեր գործով։ Չէ որ ձեր գործը գյուլենականներին և Քրդստանի աշխատավորական կուսակցության անդամներին թաքցնելն է», - հայտարարել է Թուրքիայի վարչապետը։

Թուրքիայի և Եվրամիության հարաբերությունները սրվել էին, երբ Գերմանիայի և Նիդերլանդների իշխանությունները հրաժարվել էին թուրք պաշտոնյաներին թույլատրել իրենց երկրների թուրքական սփյուռքի մոտ ելույթներ ունենալ և վերջիններիս ներկայացնել Թուրքիայի սահմանադրական փոփոխությունների նախագիծը, որով նախատեսվում է կառավարման խորհրդարանական համակարգից անցում դեպի նախագահականի։

Բարձրացած սկանդալից հետո Թուրքիայի նախագահ Ռեջեփ Թայիփ Էրդողանը հայտարարել է ևս մեկ հանրաքվե անցկացնելու հնարավորության մասին։ Էրդողանն առաջարկում է քվեարկության դնել Եվրամիությանն անդամակցելու նպատակահարմարության հարցը։

Հիշեցնենք, որ Թուրքիայում սահմանադրական փոփոխությունների հանրաքվեն կանցկացվի հաջորդ ամսվա 16-ին։