Թրամփի օրոք Միացյալ Նահանգները լինելու է Իսրայելի հավատարիմ ընկերը. ԱՄՆ փոխնախագահ
Միացյալ Նահագները Դոնալդ Թրամփի կառավարման ժամանակ պաշտպանելու է Իսրայելի շահերը և լինելու է նրա «հավատարիմ ընկերը»։ Այս մասին մարտի 30-ին Սպիտակ տանը կայացած՝ Իսրայելում ԱՄՆ-ի նոր դեսպան Դևիդ Ֆրիդմանի երդմնակալության հանդիսավոր արարողության ժամանակ հայտարարել է ԱՄՆ-ի փոխնախագահ Մայք Փենսը։
Նրա խոսքով՝ Թրամփը ողջ կյանքի ընթացքում եղել է Իսրայելի և հրեա ժողովրդի ընկերը։ «Միջազգային հանրությունն ականատես կլինի, որ նրա նախագահության օրոք Միացյալ Նահանգները կանգնած կլինի Իսրայելի կողքին», - նշել է Փենսը։
Անդրադառնալով Ֆրիդմանին՝ ԱՄՆ-ի փոխնախագահը պատմել է, որ նա Իսրայելում եղել է ավելի քան 75 անգամ, իսկ նրա հայրը ռաբբի է եղել Նյու Յորքում։
«Ֆրիդմանի նշանակումը Իսրայելում ԱՄՆ-ի դեսպանի պաշտոնին հստակ կերպով ցույց է տալիս ամերիկյան վարչակազմի՝ հրեա ժողովրդին և Իսրայելին օգնելու պատրաստակամությունը։ Մեզ համար միշտ էլ առաջնային է եղել Իսրայելի անվտանգության և խաղաղության հարցը», - ասել է Փենսը։
Դևիդ Ֆրիդմանն Իսրայելում ԱՄՆ-ի 20-րդ դեսպանն է։ Նա հայտնի է որպես Պաղեստինի օկուպացված տարածքներում հրեական բնակավայրերի կառուցման ակտիվ ջատագովներից։ Դեմ լինելով ընդհանրապես Պաղեստին պետության գոյությանը՝ Ֆրիդմանը վստահեցնում է, որ ինքն աշխատելու է հանուն Մերձավոր Արևելքի խաղաղության և կայունության։