Էրդողանն Անկարայում հանդիպում է ունեցել ԱՄՆ պետքարտուղարի հետ

Մարտի 30-ին Թուրքիայի նախագահ Ռեջեփ Թայիփ Էրդողանը ԱՄՆ պետքարտուղար Ռեքս Թիլերսոնի հետ Անկարայում ունեցած հանդիպման ժամանակ քննարկել է Իսլամական պետության դեմ պայքարում համագործակցության հնարավորությունները։ Այս մասին հայտնում է թուրքական NTV Haber-ը։

Նշվում է, որ հանդիպմանը Էրդողանը անդրադարձ է կատարել Ֆեթուլլահ Գյուլենի արտահանձման հարցին՝ նշելով, որ ԱՄՆ-ում գյուլենական շարժման գործունեությունը պետք է դադարեցնել։ Թուրքիայի նախագահն առաջարկել է միջոցներ ձեռնարկել թուրք-ամերիկյան հարաբերությունների լավացման ուղղությամբ։

Թուրքական «Անադոլու» լրատվական գործակալության փոխանցմամբ՝ ավելի վաղ Թիլերսոնը հանդիպում էր ունեցել Թուրքիայի վարչապետ Բինալի Յըլդըրըմի և արտգործնախարար ՄևլութՉավուշօղլուի հետ։ Այս հանդիպման ընթացքում շոշափվել է ահաբեկիչներից Սիրիական Ռաքքայի ազատագրման հարցը։ Կողմերն անդրադարձել են նաև Վաշինգտոնի կողմից Սիրիայի քրդերին օժանդակելու՝ թուրքերի համար ցավոտ թեմային (Սիրիայի քրդերին Անկարան համարում է ահաբեկիչներ)։ Թուրքական կառավարության ներկայացուցիչներն իրենց հերթին ևս հիշեցրել են Գյուլենի արտահանձման հարցի կարևորության մասին։