Բրիտանացի լրագրողուհու խիստ արձագանքը Միացյալ Թագավորության մասին Եվրոպական հանձնաժողովի նախագահի հայտարարությանը

Անգլիացի հայտի լրագրող և հաղորդավարուհի Քեթի Հոփկինսը բուռն կերպով է արձագանքել Եվրոպական հանձնաժողովի նախագահ Ժան Կլոդ Յունկերի՝ Միացյալ Թագավորության հասցեին հնչեցրած սպառնալիքներին: Այս մասին հաղորդում է Express պարբերականը:

LBC  ռադիոընկերության հաղորդման հյուր Քեթի Հոփկինսն, իր խոսքն ուղղելով Եվրոպական հանձնաժողովի նախագահին, ասել է, որ Բրյուսելը պետք է ընդունի Եվրամիության կազմից Միացյալ Թագավորության դուրս գալու փաստը:

«Ես չեմ հասկանում, թե մենք ինչու պետք է վճարենք դուրս գալու տուգանքը, քանի դեռ պայմանագիրը կնքված չէ:  Կարծում եմ՝ արդեն ժամանակն է, որ ԵՄ-ն հասկանա, որ մենք դուրս ենք եկել իր կազմից: Ուստի, Յունկե՛ր, եթե նկատել եք դուռն արդեն փակ է, և Դուք այժմ խոսում եք փակ դռան հետ»,- ավելացրել է Հոփկինսը:

Չնայած դեռ Եվրամիության կազմից դուրս գալու վերջնահաշվարկը չի ներկայացվել, բայց ենթադրվում է, որ այն կկազմի 52 միլիարդ ֆունտ ստերլինգ:

Նշվում է, որ մարտի 31-ին ԵՄ ղեկավար մարմնի կողմից  առաջարկած օրինագիծը թույլ կտա Իսպանիային վերահսկողություն սահմանել Ջիբլարթարի վրա՝ խոչընդոտելով Մեծ Բրիտանիայի և դաշնակիցների հետագա փոխհարաբերությունները:

Այս առիթով անգլիացի լրագրողուհին նշել է. «Ուզում եք ասել, որ պատրաստվում եք խլե՞լ Ջիբլարթարը: Ոչ մի դեպքում: Մենք այլևս չենք ցանկանում ձեր մասը կազմել, մենք չենք ուզում վճարել ձեր հսկայական կենսաթոշակային պակասուրդը: Մենք պարզապես ցանկանում ենք հոգ տանել մեր սեփական ժողովրդի մասին՝ անհրաժեշտ պայմաններով ապահովելով մեր ծերերին»,- հավելել է LBC ռադիոընկերության հյուրը:

Բրիտանացի քաղաքական գործիչները նույնպես զայրացած են Ջիբլարթարի «առքուվաճառքի» վերաբերյալ ԵՄ-ի հայտարարությունից:

«Ջիբլարթարը չի վաճառվում: Մեր կառավարության որոշումն անփոփոխ է: Ջիբլարթարը չի կորցնի իր ինքնավարությունն առանց սեփական ժողովրդի և Միացյալ Թագավորության համաձայնության»,- հայտարարել է Մեծ Բրիտանիայի արտաքին գերատեսչության ղեկավար Բորիս Ջոնսոնը: