Թերեզա Մեյը երկարաձգում է ԵՄ-ի հետ ազատ ելումուտի գործընթացը
«Բրեքզիթից հետո Եվրամիության երկրներից դեպի Մեծ Բրիտանիա մարդկանց մուտքի գործընթացը կերկարաձգվի»,- BBC պարբերականը փոխանցում է վարչապետ Թերեզա Մեյի հայտարարությունը:
Վարչապետը նշել է, որ ԵՄ-ից դուրս գալուց հետո կառավարությանը «որոշ ժամանակ» պետք կգա նոր սահմանափակումներին հարմարվելու համար:
BBC-ի քաղաքական խմբագրի տեղակալ Ջոն Պինարի խոսքերով՝ ազատ տեղաշարժի հնարավորության հարցը դեռ փակված չէ, թեկուզև ժամանակավորապես:
Հորդանան և Սաուդյան Արաբիա կատարած պաշտոնական այցի ընթացքում զրուցելով լրագրողների հետ՝ վարչապետն ընդգծել էր, թե ինչ կլինի, երբ Բրեքզիթից հետո անցումային փուլ սկսվի:
«Խիստ կարևոր է, որ Բրիտանիայի ժողովուրդը, որն իր մասնակցությունն է ունեցել անցյալ տարվա ընտրություններին, գիտակցի, որ դրա նպատակն էր ապահովել մեր սահմանների և մեր ներգաղթյալների վերահսկողությունը: Դա հենց այն է, ինչ մենք կանենք Եվրամիությունից դուրս գալուց հետո», - ասել է Մեծ Բրիտանիայի վարչապետը։
Ապագա միգրացիոն քաղաքականության հեռանկարն ամենակարևոր հարցերից մեկն է Բրեքզիթից հետո: Մեյի խոսքերով՝ ամենակարևոր փոփոխությունն այն է, որ սահմանները և միգրացիոն քաղաքականությունը կլինեն Մեծ Բրիտանիայի վերահսկողության ներքո:
Վարչապետը հերքել է Բրյուսելի այն պնդումները, թե անցումային շրջանը կտևի երեք տարի:
Լրագրողների հաջորդ հարցը վերաբերում էր ԵՄ-ի հետ նոր առևտրական պայմանագրի կնքմանը. Եվրախորհրդի նախագահ Դոնալդ Տուսկի հայտարարության համաձայն՝ այդ պայմանագիրը կնքվում է միայն ԵՄ-ին չանդամակցող երկրների հետ, ինչը նշանակում է, որ Մեծ Բրիտանիան ստիպված կլինի սպասել մինչև գործընթացի ավարտը:
«Առևտրական պայմանագրի կնքումը կարելի է իրականացնել միանգամայն օրինական ճանապարհով: Կարծում եմ ՝բոլորն էլ պետք է իմանան, որ մեր ունեցած պայմանավորվածությունները թույլ են տալիս պլաններ կազմել Բրեքզիթից հետո մեր և ԵՄ-ի ապագա համագործակցության և փոխհարաբերությունների վերաբերյալ»,- Sky News-ին տված հարցազրույցի ընթացքում ասել է Մեյը: