Հյուսիսային Կորեան նոր միջուկային փորձարկում է պատրաստում
Հյուսիսային Կորեան ուսումնասիրող «38 Հյուսիս» ծառայությունը հայտնել է, որ երկրի հյուսիսում գտնվող Փհունգերի կոչվող վայրը «մարտական պատրաստվածության է» բերվել վեցերորդ միջուկային փորձարման համար:
«Նախորդ վեց շաբաթների գործունեությունը կապված էր հենց այս փորձարկման հետ», - CNN-ին հայտնել է «38 Հյուսիս» ծառայության վերլուծաբան Ջոզեֆ Բերմուդեսը:
Նրանց ենթադրությունները կապված են Ճապոնիայի վարչապետ Շինձո Աբեի այն հայտարարության հետ, թե Հյուսիսային Կորեան կարող է «զարին» նյարդակաթվածային թունավոր գազով հագեցած հրթիռներ արձակել:
Բերմուդեսը և այլ վերլուծաբաններ, հիմնվելով կոմերցիոն արբանյակների տրամադրած ատոմակայանի լուսանկարների վրա, փորձում են նախորդ փորձարկումները հիշեցնող տարրեր գտնել դրանցում:
Վերլուծաբանը և նրա գործընկեր Ջեք Լիուն ճշգրիտ կերպով կանխագուշակել էին սեպտեմբերին տեղի ունեցած նախորդ միջուկային փորձարկումը:
«Մենք համեմատում ենք արբանյակներից ստացած բոլոր լուսանկարները: Վերջին նկարներից պարզ դարձավ, որ ջրի մատակարարումը ատոմակայնում դադարեցվել է, ինչը նշանակում է, որ միջուկային փորձարկումն անխուսափելի է»,- նշում են փորձագետները։
Տոկիոյում տեղի ունեցած հանդիպման ժամանակ Ատոմային էներգիայի միջազգային գործակալություն տնօրեն Յուկիյա Ամանոն ասել էր. «Հյուսիսային Կորեայի միջուկային ծրագիրը կայուն առաջընթաց է գրանցում»:
Ապրիլի 15-ին Հյուսիսային Կորեայում նշվում է «արևի օրը», որը նվիրված է երկրի հիմնադիր Կիմ Իլ Սոնգի 105 ամյակին: Այդ օրը հատկանշական է նաև զինամթերքի փորձարման համար: Ենթադրվում է, որ միջուկային փորձարկումը նույնպես նվիրված է այդ օրվան: