Յուրի Խաչատուրովը՝ ՀԱՊԿ Գլխավոր քարտուղար
Հավաքական անվտանգության պայմանագրի կազմակերպության (ՀԱՊԿ) Գլխավոր քարտուղարի պաշտոնը 2017 թ. մայիսի 2-ից կզբաղեցնի ՀՀ Ազգային Անվտանգության Խորհրդի քարտուղար Յուրի Խաչատուրովը։ Այս մասին հայտարարել է ՀԱԿՊ Գլխավոր քարտուղարի ժամանակավոր պաշտոնակատար Վալերի Սեմերիկովը։
«Հավաքական անվտանգության պայմանագրի կազմակերպության Գլխավոր քարտուղարի նշանակման հարցի քննարկմանը միաձայն որոշվել է, որ այս տարվա մայիսի 2-ից այդ պաշտոնը կզբաղեցնի Յուրի Գրիգորիի Խաչատուրովը», - ՀԱՊԿ-ի ոչ պաշտոնական գագաթնաժողովի ավարտին լրագրողներին հայտնել է Սեմերիկովը։
Նա նաև նշել է, որ ՀԱՊԿ անդամ երկրների ղեկավարները որոշել են կազմակերպության նախկին գլխավոր քարտուղար Նիկոլայ Բորդյուժային պարգևատրել ՀԱՊԿ խորհրդի առաջին աստիճանի շքանշանով։
Յուրի Խաչատուրովը ծնվել է 1952 թ. մայսիս 1-ին։ 2008-2016 թ.թ. եղել է ՀՀ Զինված ուժերի Գլխավոր շտաբի պետը։ 2016 թ. հոկտեմբերի 3-ին ՀՀ Նախագահի հրամանագրով նշանակվել է ՀՀ Ազգային Անվտանգության Խորհրդի քարտուղար և մինչ օրս զբաղեցնում է այդ պաշտոնը։