ԱՄՆ-ի համբերությունը Հյուսիսային Կորեայի հանդեպ սպառվել է. Մայք Փենս
ԱՄՆ-ի փոխնախագահ Մայք Փենսը հայտարարել է, որ Հյուսիային Կորեայի հանդեպ ԱՄՆ-ի «ռազմավարական համբերության ժամանակաշրջանն ավարտվել է». գրում է BBC-ն:
Փենսն այս հայտարարությունն արել է երկու Կորեաները բաժանող ապառազմականացված գոտում՝ Հարավային Կորեա կատարած պաշտոնական այցի ընթացքում:
Նա Սեուլ է ժամանել կիրակի՝ ապրիլի 16-ին՝ հյուսիսկորեական ձախողված հրթիռային փորձարկումից ժամեր անց:
Այսօր՝ ապրիլի 17-ին, ԱՄՆ-ն և Հվ. Կորեան մեկնարկել են համատեղ ռազմաօդային զորավարժություններ՝ Հս. Կորեայի դեմ պատրաստվածություն ապահովելու համար: Այս մասին տեղեկացնում են հարավկորեական լրատվամիջոցները:
Փենսը, որի հայրը Կորեական պատերազմի մասնակից է եղել, այցելել է Փանմունջոմ գյուղ, որտեղ կնքվել է հրադադարի պայմանագիրը:
Հվ. Կորեայի գործող նախագահ Հվան Գյո-Անի հետ զրույցում ԱՄՆ վարչապետը նշել է, որ Հս. Կորեան միջուկային և հրթիռային փորձարկումներ է իրականացրել, քանի որ ամերիկյան նախորդ վարչակազմը «ռազմավարական համբերատարության» քաղաքականություն էր վարում, սակայն դա արդեն անցյալում է:
BBC-ի փոխանցմամբ՝ Փենսը ևս մեկ անգամ հաստատել է, որ ԱՄՆ-ն Հվ. Կորեայի կողքին է և միշտ պատրաստ է աջակցել:
Հվ. Կորեայի նախագահն իր հերթին ողջունել է իրենց տարածքում ամերիկյան հակահրթիռային պաշտպանական համակարգի (հայտնի որպես Thaad) տեղակայումը, որը նախագծված է Հս. Կորեայի սպառնալիքներից պաշտպանվելու համար:
Մաքսիմալ բարձրության տարածքի պաշտպանության համակարգը (Thaad) ոչնչացնում է ծացր և միջին բարձրության բալիստիկ հրթիռներ դրանց թռիչքի վերջնական փուլում։ Հակահրթիռային Thaad համակարգն օգտագործում է «հարվածել-ոչնչացնել» տեխնոլոգիան, որի դեպքում կինետիկ էներգիան կործանում է մուտքային հրթիռը։ Ունի 200 կմ ոչնչացման շառավիղ և հասնում է 150 կմ բարձրության։
ԱՄՆ-ն այս համակարգը նախկինում տեղակայել է Գուամում և Հավայան կղզիներում՝ Հս. Կորեայի հնարավոր հարձակումներից պաշտպանելու համար: